Qazaqstanda 64 jastaǵy áıeldiń koronavırýstan kóz jumǵanyna qatysty jańa málimetter jarıalandy. Bul týraly Aqmola oblysy densaýlyq saqtaý basqarmasynyń basshysy Súlen Ilásov brıfıńte aıtty. 

Áıeldiń ólimine eki jaqty pnevmonıa, tynys jetispeýshiligi, qant dıabeti saldarynan bolǵan sepsıs, gıpertonıa jáne ateroskleroz sebep bolǵan. Pnevmonıanyń sebebi – koronavırýs.

– Naýqas medısınalyq mekemege 25 naýryz kúni saǵat 07:00-de aýyr jaǵdaıda jetkizilgen. Onda tynys alý jetkiliksizdigi, ıntoksıkasıa sındromy jáne sonymen qatar júretin patologıalar bolǵan. Algorıtmge sáıkes, COVID-19 bolýy múmkin degen kúdikpen JRVI-ge aldyn ala tótenshe habarlama berilgen. Ol №2 Kópsalaly oblystyq aýrýhananyń oqshaýlanǵan bólmesine jatqyzylǵan. Týystarynyń aıtýynsha, ol shetelge shyqpaǵan jáne JRVI, koronavırýs dertine shaldyqqandarmen baılanysta bolmaǵan. 13-17 naýryz aralyǵynda Almatyda jáne Shýda qonaqta bolǵan, – dedi Súlen İlıasov.

Onyń aıtýynsha, naýqaspen baılanysta bolǵan adamdar oqshaýlanyp, olardan koronavırýs synamalary alynǵan.

– 13-17 naýryzda Almaty men Shý qalalarynda qonaqta bolǵan. Epıdemıaǵa qarsy barlyq jumys júrgizilip jatyr. Aqmola oblysynda koronavırýstan alǵashqy ólim tirkeldi, – dedi ol.

Súlen İlıasov koronavırýstan kóz jumǵan áıeldiń jaqyndaryna kóńil aıtty.

Eske sala keteıik, keshe aqparat jáne qoǵamdyq damý mınıstri Dáýren Abaev koronavırýs indetinen bir naýqas qaıtys bolǵanǵanyn habarlaǵan bolatyn.