Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymova Almatyda COVID-19 testinen ótýge bolatyn oryndar ashylatynyn málimdedi.

– Koronavırýstyq ınfeksıanyń keńinen taralyp ketpeýi úshin búkil álemde qoldanylatyn eki tıimdi ádis bar. Birinshisi – árbir azamat óz-ózin oqshaýlaý kerek, ekinshisi – testileýden ótý. Úkimet COVID-19 vırýsyn anyqtaıtyn testi satyp alýǵa qarjy bóldi, – dedi A. Moldaǵasymova.

 

Densaýlyq saqtaý mınıstrligi engizgen erejege sáıkes, COVID-19 testileýinen ótýge KVI juqtyrǵan bolýy múmkin degen adamdar; naýqastanǵandarmen baılanysta bolǵandar; qaterli indet keń taralǵan memleketterden kelgen adamdar jáne medısına qyzmetkerleri sanalady.

– Testileýdiń kelesi túri – jedel-testter, olar qazirgi tańda qalaǵa tústi. Qazir «Olımp» medısınalyq zerthanasy sanıtarlyq erejelerge sáıkes 5 pýnkt daıyndady. Qaıyrymdylyq qorlarynyń biri Densaýlyq saqtaý basqarmasyna qosymsha jedel-test satyp áperdi. Búgingi tańda basqarmada 8 pýnkt naqtylandy, olar jaqyn arada jumysqa kirisedi, – dedi departament basshysy Aızat Moldaǵasymova.

Sonymen qatar ol jedel-testileý jumysy aqparattyq qyzmetpen rettelip otyratynyn jáne jedel járdem qyzmetkerleri, stasıonarda jatpaǵan biraq JRVI-men aýyrǵandar, sozylmaly aýrýlary bar jandar, quqyq qorǵaý organdarynyń, Ulttyq gvardıa ókilderi, eriktiler, ákimdik jáne komýnaldyq qyzmetterdiń ókilderi de jedel-testten ótýine bolatynyn atap ótti.

Jedel-testileýden qalaı ótýge bolady?

– Bul jedel-testileýden ótinim bergen jáne naqty kórsetilgen siltemelerde saýalnama málimetterin toltyrǵan tulǵalar óte alady. Siz saýalnamalyq derekterde kórsetken sımptomdaryńyz boıynsha test tapsyrý úshin irikteýden ótesiz. Ótinishińiz maquldanǵannan keıin sizge SMS-habarlama keledi, onda jedel-test ótetin jerdiń meken-jaıy men ýaqyty kórsetiledi, – dep sózin qorytyndylady.

Aıta ketetin jáıt, brıfıń kezinde jedel-testileýden ótý qala boıynsha tegin ekendigi aıtyldy.