Almaty qalasy Taýarlar men qyzmetterdiń sapasyn baqylaý departamentiniń basshysy Aızat Moldaǵasymova megapolıstegi epıdemıologıalyq jaǵdaıdyń jaı-kúıin onlaın brıfıńte baıandady.

– Búgingi kúni tirkelgen 119 jaǵdaı boıynsha 35 naýqas aýrýdy shetelden juqtyryp kelgen bolsa, 67 naýqas osy ınfeksıa juqtyrǵandarmen baılanysta bolǵan. Olardyń bári óz ýaqytynda tıisti provızorlyq jáne ınfeksıalyq stasıonarlarǵa oqshaýlanyp, qazirgi kezde em alýda. Sondaı-aq jergilikti jerde 6 adam ınfeksıa juqtyrsa, olarmen baılanysta bolǵan 11 adamda koronavırýs tirkelgen. Oǵan qosa, bir úıdiń 4 adamy osy ınfeksıany ákesinen juqtyrǵan degen derek bar. Biraq der kezinde bólektep, oqshaýlaý qoldanylǵandyqtan ınfeksıanyń ósimi tejeldi, – dedi Aızat Moldaǵasymova.

Ol vırýspen aýyrǵan naýqastardyń jas ereksheligin jiktep aıtty. Osyǵan deıin koronavırýspen aýyrǵandardyń basym kópshiligi 20, 29, 30, 39 jastaǵy azamattar bolsa, qazir bul kórsetkish ózgerip jatqanyn atap ótti.

Onyń aıtýynsha 50-59 jastaǵy adamdardyń aýrý deregi kóbeıýde. Odan bólek, 30-dan 39 jasqa deıingi adamdar arasynda ınfeksıa juqtyrý deregi 7-den 21 jaǵdaıǵa deıin artqan.

– Búgingi kúni ınfeksıa oshaǵynyń sany 39-ǵa azaıdy. Esterińizge sala ketsek, maýsym basynda 54 oshaq tirkelgen bolatyn.  Stasıonarlyq karantındegi 189 adammen tyǵyz baılanysta bolǵan 12 555 adam synaqtan ótkizilse, sonyń 119-y oń nátıje berdi, – dep aıtty departament basshysy.