Youtube jelisindegi Aina arnasyna suhbat bergen Qazaqstannyń eks-prezıdenti, qazir bıliktegi "Nur Otan" partıasynyń jáne Qaýipsizdik keńesiniń tóraǵasy bolyp otyrǵan Nursultan Nazarbaevtyń inisi Bolat Nazarbaev birinshi áıeli týraly aıtty. 

Onyń sózinshe, birinshi áıeli qara shańyraqta turady. 

"Men áskerden kelgennen keıin marqum aǵam Satybaldy "Birinshi maı" degen aýylda turatyn. Baýyrym ekeýmiz Úshtóbede júrgizýshi bolyp jumys istedik. Sol sovhozda Gúljandy kezdestirdim (red. birinshi áıelin aıtyp otyr). 1974 jyly 4 jeltoqsanda Shamalǵanǵa alyp keldim. Gúljan ekeýmizde eki qyz, bir ul bar. Otaý qurǵanymyzǵa elý jyl bolyp qaldy. Ekeýimiz bir-birimizdi qaraǵanymyzdan-aq túsinemiz. Ózińe anańdaı bolyp ketedi eken, erkeleısiń oǵan. Nesin aıtaıyn...? Ondaı adamdy áli kúnge kezdestirgen joqpyn. Osy kúnge deıin qarsy kelgen emes" dedi eks-prezıdenttiń inisi. 

Áleýmettik jelide Qazaqstandy 30 jylǵa jýyq úzdiksiz basqarǵan Nursultan Nazarbaevtyń inisi Bolat Nazarbaevtyń birneshe áıeli bar ekeni aıtylyp júr. Biraq Bolat Nazarbaevtyń jeke ómiri týraly resmı málimet joq.