Qaladaǵy dárihana uıymdary óz qyzmetkerlerin jeke qorǵanys quraldarymen qamtamasyz etedi. Bul týraly qalalyq ákimdiktiń baspasóz ortalyǵynda ótken brıfıń kezinde Qazaqstan Respýblıkasy Farmasevtıkalyq qyzmetti qoldaý jáne damytý qaýymdastyǵynyń prezıdenti Marına Dýrmanova aıtty.

Onlaın brıfıń kezinde qaýymdastyq prezıdenti COVID-19 ınfeksıasy farmasevtter arasynda tirkelmegenin atap ótti. Óıtkeni, ár dárihana uıymy óz qyzmetkerlerin barlyq qorǵanys quraldarymen qamtamasyz etedi dedi.

– Dárigerler sıaqty farmasevtter de qaýip-qaterdiń basynda júr. Almaty qalasynyń Bas sanıtarlyq dárigeriniń dárihanalyq uıymdardaǵy farmasevtterdi qorǵaý jónindegi qaýlysyna sáıkes, arnaıy talaptar – qolǵaptar, bas kıimder jáne betperde bolýy tıis. Ár dárihana uıymy óz qyzmetkerlerin barlyq qorǵanys quraldarymen qamtamasyz etedi, sonymen qatar dárihanalardyń ishi men syrty, kire beris tósenishterine deıin óńdeledi, – dedi Marına Dýrmanova.

Aıta keteıik, karantın engizilgeli beri atalǵan qaýymdastyq pen qala ákimdigi birlesip, qalada tapshylyq bolmas úshin barlyq medısınalyq kerek-jaraqtardyń úzdiksiz jetkizilýin qamtamasyz etýde.