Indýstrıa jáne ınfraqurylymdyq damý mınıstrligi komýnaldyq qyzmetter úshin 15 myń teńge tóleýge ótinim qabyldaý ákimdikter ótinim qabyldaıtyn arnaýly júıeni iske qosqan soń bastalatanyn habarlady.
Komýnaldyq qyzmetterdi jetkizýshilerdiń shyǵyndaryn óteý tártibi aǵymdaǵy jyldyń 18 sáýirinde bekitildi jáne búgingi tańda ákimdikter ótinimderdi qabyldaý úshin call-ortalyqtar men aqparattyq resýrstar qurý boıynsha shuǵyl sharalar qabyldap jatyr. Ákimdikter ótinimderdi qabyldaıtyn arnaýly júıeni daıyndaǵannan keıin ol týraly jergilikti turǵyndardy habarlandyrady.
"Memleket aǵymdaǵy jyldyń sáýir jáne mamyr aılary úshin komýnaldyq qyzmetterge aqy tóleıdi, sondyqtan ótinim berýge asyqpaý qajet. Óıtkeni barlyq ótinishter mamyr aıyn qosa alǵandaǵy kezeńde qabyldanady.
Ótinimder call-ortalyqtar men aqparattyq júıeler arqyly qabyldanady. Ákimdikterge tutynýshynyń jeke sáıkestendirý nómirin, áleýmettik mártebesin jáne esepshotynyń derekterin usyný qajet" delingen aqparattyq habarlamada.
Ákimdikter jáne Eńbek jáne halyqty áleýmettik qorǵaý mınıstrligi usynystarynyń negizinde mynadaı sanattaǵy adamdardyń komýnaldyq qyzmetterine tólem júrgiziledi:
1) 1, 2 jáne 3 toptaǵy múgedekter;
2) Uly Otan soǵysynyń múgedekteri men qatysýshylary jáne Uly Otan soǵysynyń múgedekteri men qatysýshylaryna teńestirilgen adamdar;
3) múgedek balalardy tárbıeleýshi otbasylar;
4) kópbalaly otbasylar;
5) eń tómen jáne az zeınetaqy alatyn zeınetkerler;
6) memlekettik nemese qoǵamdyq mindetterin, áskerı qyzmetin oryndaý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý kezinde, quqyq tártibin qorǵaý kezinde qaza tapqan (qaıtys bolǵan) adamdardyń otbasylary;
7) ataýly áleýmettik kómek alatyn azamattar, onyń ishinde jalǵyz basty zeınetkerler.
15 myń teńge mólsherindegi tólem aı saıyn komýnaldyq qyzmetterdi tutynýshylardyń esepshotyna (abonenttik shotqa) jiberiletin bolady. Iaǵnı ony eshkim qolma-qol nemese kartochkasy arqyly almaıdy.
Kómek komýnaldyq qyzmetterdi jetkizýshilermen óz atynan shart jasasqan jáne karantın engizilgen eldi mekende turatyn kórsetilgen sanattardaǵy adamdarǵa kórsetiletin bolady.
Múgedek balalardy tárbıeleýshi otbasylar, kópbalaly otbasylar jáne qyzmetin oryndaý kezinde qaza tapqan adamdardyń otbasylaryna kelsek, olardyń otbasynyń bir múshesinde komýnaldyq qyzmetterdi jetkizýshilermen shart jasalǵan bolýy tıis.
Pikir qaldyrý