Jambyl oblysynyń atqaminer azamattary #BizBirgemiz chellendjin qoldap, qaladaǵy jalǵyz basty qarttarǵa, turmysy tómen kópbalaly otbasylarǵa asa qajetti medısınalyq maska, antıseptıktıkalyq quraldar men azyq-túlikter jetkizdi. 

Alǵashqylardyń biri bolyp aksıaǵa atsalysqan Qazaqstannyń sport maıtalmany Beıbit Ystybaev prezıdent bastamasyn qoshtaýdy jón kórgen. Ol óz sózinde osynaý qıyn-qystaý ýaqytta qol qýsyryp otyra almaǵanyn aıtyp, 100 muqtaj otbasyǵa kómekteskenin atap ótti.

– Qıyndyq týǵanda qol-qýsyryp úıde otyra almadyq. Jambyl oblysynyń atqaminer azamattary, aǵalary bolyp #BizBirgemiz aksıasyn qoldap, "ár qazaq – meniń jalǵyzym" dep jastarǵa úlgi bola otyryp, saýapty is jasap jatyrmyz, – dedi B. Ystybaev.

Ol osyndaı álem barysy dárejesine jetýine halyqtyń sebepker bolǵanyn aıtyp, syn saǵatta áleýmettiń osal toptaryna qaraılasýdy paryzy sanaıtynyn da jasyrmady. Sportshy barsha qazaqstandyqtardy, sonyń ishinde óńirdiń basshylary men kásipkerlerin qıyn shaqta birigip, áreket etýge shaqyrdy.

– Qurmetti Jambyl oblysynyń atqaminer azamattary barshańyzdy #BizBirgemiz aksıasyn qoldaýǵa, muqtaj jandarǵa kómek qolyn sozýǵa shaqyramyn. Elimiz qaýipti indetten aman shyǵý úshin bir jaǵadan bas, bir jeńnen qol shyǵaryp atsalysaıyq, – degen Ystybaev chellendjdi ári qaraı joldady.

BizBirgemiz aksıasy aıasynda chellendjdi jalǵastyrǵandardyń biri – «BAQ ındýstrıa» kompanıasynyń ujymy. 

Kompanıa dırektory Baqtıar Toǵaıbaevtyń sózinshe, kompanıa 100 otbasyǵa kómek qolyn sozǵan.

– Biz de kompanıamyzdyń atynan 100 otbasyǵa kómektesýdi bastap kettik. Osy tusta qalamyzdyń basshysy Berdibek Saparbaevqa alǵysymdy aıtqym keledi. Ol kisiler úkimet tarapynan halyqqa kómektesip, qajetti zattarmen qamtamasyz etip jatyr. Sonymen qatar biz sıaqty kásipkerlerge de qoldaý bildirýde. Al biz halyqqa kómektesýdemiz, – dedi kompanıa dırektory.

Tarazdan bastaý alǵan ıgi istiń kókjıegi keńeıip, áleýmettik áleýeti tómen tarazdyq 50 otbasydan bólek, Talas aýdanynyń 50 januıasy kásipkerlerden qoldaý alǵan.

– Osy chellendjge Tarazdyń barsha myqty azamattaryn shaqyramyn. Qaýipti indetten aýlaq bolaıyq. Qudaı qalasa, bul aýrýdy jeńemiz. El bolyp, jer bolyp barshamyz biraýyzdan atsalysaıyq. Beıbit Ystybaev aǵamyzdyń bastaǵan aksıasyn qoldaıyq. Chelledjdi kásipker, Talas aýdanynyń azamaty "Qarataý joldarynyń" dırektory Maqsat myrzaǵa joldaımyz. Biz halyqpen birgemiz! – degen Baqtıar Toǵaıbaev aksıany elim degen azamattardyń bárine arnaıdy.

Jobanyń maqsaty da sol – bastamaǵa jalpyhalyqtyq sıpat berý!