Almatyda COVID-19 indetin juqtyrǵan 669 jaǵdaı tirkeldi.  Al sońǵy táýlikte qalada 145 jańa jaǵdaı anyqtalǵan. Bul týraly ákimdiktiń baspasóz qyzmeti habarlady.

Olardyń 104-i Ortalyq qalalyq klınıkalyq aýrýhananyń, 12-i №12 qalalyq emhananyń, 11-i qazirgi ýaqytta provızorlyq ortalyq bolyp tabylatyn qalalyq pallıatıvtik kómek ortalyǵynyń qyzmetkerleri. Sondaı-aq qalǵan 18 adam vırýs juqtyrǵan naýqastarmen baılanysta bolǵan jandar.

Búginde qaladaǵy juqpaly aýrýlar stasıonarlarynda Almaty oblysynyń bir naýqasyn qosa alǵanda 577 adam qaýipti indetten emdelip jatyr.

Eki naýqastyń jaı-kúıi – óte aýyr, 6 adamda – aýyr, 168-i aýyrlyqtyń ortasha dárejesinde, al qalǵandarynyń densaýlyǵy qanaǵattanarlyq.

Jalpy 88 naýqas qaýipti indetten saýyǵyp shyqty. Provızorlyq gospıtáldarda 452 adam, karantındik oqshaýlaýda 352 jáne úı karantıninde 9950 adam bar.

Megapolıstegi Bostandyq aýdanynyń bas sanıtarlyq dárigeriniń qaýlysyna sáıkes №12 qalalyq emhana karantınge jabyldy.

Ortalyq qalalyq klınıkalyq aýrýhanaǵa qatysty aıtar bolsaq, stasıonar taza jáne vırýs juqtyrǵan aımaqtarǵa bólingen. Búginde emhanada qosymsha 150 juqpaly, 60 provızorlyq jáne 150 karantındik tósek-oryn ashyldy. Em qabyldap jatqan naýqastarǵa medısınalyq kómek obaǵa qarsy kıim-keshek kıilip kórsetiledi. Bul rette em júrgizip jatqan medısına qyzmetkerleriniń barlyǵynda taldaý nátıjeleri teris.

Taldaýlary oń nátıje bergen medısına qyzmetkerleri jumystan shettetilip, ınfeksıalyq stasıonarlar men bólimshelerde em-dom qabyldaýda.

Ákimshilik qyzmetkerlerdi áleýmettik qorǵaý boıynsha turaqty jumys júrgizýde. Karantın jáne jabyq keńistik adamdardyń psıhologıalyq jaǵdaıyna keri áser etýi múmkin. Osyny eskergen mamandar ujymdaǵy qarym-qatynas ádisin de durys jolǵa qoıýda.

Aıta ketý kerek, qaladaǵy barlyq medısınalyq uıymdar qajetti jeke qorǵaný quraldarymen tolyq qamtylǵan.