Almaty qalasynyń ákimi Baqytjan Saǵyntaev QHR dárigerleriniń delegasıasymen onlaın-rejıminde koronavırýsqa qarsy kúres boıynsha tájirıbe almasý máselelerin talqylady.

QHR dárigerleri qalanyń medısınalyq mekemelerindegi jaǵdaımen, koronavırýstyq ınfeksıamen aýyratyn naýqastardy emdeý jáne aldyn alý ádisterimen tanysty. Sondaı-aq medısına qyzmetkerlerine arnalǵan birqatar oqytý trenıńterin ótkizdi. Qytaı delegasıasynyń quramynda pýlmonologıa, juqpaly aýrýlar, qarqyndy terapıa, epıdemıologıa, qoǵamdyq densaýlyq saqtaý salasyndaǵy sarapshylar bar.

Qala ákimi B. Saǵyntaevpen áńgime barysynda Qytaı mamandary qalanyń koronavırýsqa qarsy kúreske daıyndyǵynyń joǵary deńgeıin, jappaı testileýdiń mańyzdylyǵyn atap ótti. Sondaı-aq azamattardyń koronavırýs boıynsha barlyq áleýetti baılanystary úshin karantındik sharalardyń mańyzdylyǵyn aıtty.

Sonymen qatar qala turǵyndarynyń ózin-ózi oqshaýlaýy jaqsy uıymdastyrylǵan amal ekenin aıta kelip, bul ınfeksıa oshaǵynyń ulǵaıyp, indettiń taralýyna tosqaýyl bolýdyń birden-bir joly ekenin atap ótti.

Kezdesýde naýqastardy jappaı testileý, profılaktıkalyq, emdeý jáne ońaltý ádisteriniń tıimdiligi talqylandy. Medısına qyzmetkerlerin daıyndaý men turaqty oqytýǵa erekshe kóńil bólindi. Qala ákimi Baqytjan Saǵyntaev KVI-men kúreste kómek kórsetýge kelgen QHR mamandaryna alǵysyn bildirdi.