Karantın kezinde meshitterdiń esigi jabylǵanymen, saýapty iske árdaıym jol ashyq. Musylmandar úshin eń qasıetti ári on eki aıdyń sultany sanalatyn orazanyń bastalýyna sanaýly saǵattar qaldy, dep habarlaıdy Almaty.tv tilshisi.

Eldegi tótenshe jaǵdaıǵa baılanysty aýyz bekitýge nıettengenderdiń tolǵandyrǵan birqatar suraqtaryna QMBD tolyqtaı jaýap berdi. Karantın kezinde orazanyń paryzdary qalaı oryndalmaq? Pitir sadaqany qalaı tóleımiz?

Oraza adam balasyn sabyrlyqqa tárbıelep, bardyń da, joqtyń da qadirin túsinýge shaqyratyn aı. Bul aı jaqsy isterdiń basynda bolyp, jamannan tyıylýǵa taptyrmas múmkindik deıdi din ókilderi. Aýyz bekitken jan tek iship jeýden ǵana tyıylmaı, jaqsy amaldar jasap, aınalasyn meıirim men ımandylyqqa  shaqyrýy tıis. Bıyl elde jarıalanǵan tótenshe jaǵdaıǵa baılanysty meshitterdiń esigi jabylǵanymen, qaıyrymdylyq jasaýǵa jol ashyq.

«Qadirli halaıyq! Ramazan táýbe men tárbıe, taqýalyq pen qanaǵat, shúkir men sabyr, meıirim men qaıyrymdylyq, bereke men birlik aıy. Oraza saýap jınap, rýhanı kemeldený aıy. Túıindep aıtqanda ramazan Rabbymyzdyń meıirim mahabbatyna bólenetin aı», – dedi QMDB tóraǵasy, Bas múftı Naýryzbaı qajy TAǴANULY.

Dinı basqarma ókilderiniń sózinshe bireýdiń ómirine jaýapty qyzmetkerlerge oraza ustaýdy keıinge qaldyrýyna bolady. Olar dárigerler, ushqyshtar, el tynyshtyǵyn kúzetip júrgen áskerıler men aýyr jumysta isteıtinder.

«Sonymen qatar, eldiń qarýly kúshteri, beıbit jaǵdaıdan soǵys jaǵdaıyna kóshirilgen jaǵdaıda oraza tutý áskerdiń qyraǵyly menen jaýyngerlik daıarlyǵyn álsiretýge alyp barsa orazany toqtatýǵa ruqsat etiledi. Onyń ornyna basqa kúnderi oraza ustaıdy», – dedi QMDB tóraǵasynyń orynbasary, naıb múftı Ershat OŃǴAROV.

Aýyz bekitkenderge antıseptıkalyq quraldar men spırtti tazalyq maqsatynda qoldanýǵa bolady. Ol orazany buzbaıdy. Sebebi qazir tótenshe jaǵdaıdamyz, sondyqtan vırýs kezinde densaýlyǵyna zıan keltirmeı, qaıta ony qorǵaıtyn dúnıelerdi qoldaný qajet, muny sharıǵatymyz qoldaıdy, – dedi Bas múftı. Al «musylmannyń qarýy – duǵa jasaý». Sondyqtanda elimizdiń din ǵulamalary da syndarly sátte bir-birimizge jaqsy sóz aıtyp, kómekke muqtaj otbasylarǵa qaıyrymdylyq jasap, mol sa¬ýap jınaýǵa úgitteıdi.

«Álemdi jaılap bara jatqan indetten qutylýdy aman saqtaýdy tilep,  Jaratýshy ıemizge duǵa jasap, tilek tileıik. Osyny umytpaıyq. Alla Taǵala bir aýyrtpalyqtan soń bir jeńildik beremin deıdi. Olaı bolsa sol jeńildigin tezirek bersin. Sony suraıyq. Elimiz aman bolsyn, halqymyz aman bolsyn!» – dedi R. Súleımenov atyndaǵy shyǵystaný ınstıtýtynyń dırektory Ábsattar qajy DERBİSÁLİ.

«Islam qaǵıdattaryna sáıkes qıyndyqtardan keıin kóp jeńildikter keledi. Jáne qıyndyǵy kóbeıgen is-árekettiń saýaby da kóp bolatyndyǵy sózsiz. Sondyqtan bul qıyndyqtardan keıin de elimizge berekeli, merekeli kezeńder keledi dep senemiz. Qazaqstan musylmandary dinı basqarmasynyń málimdemelerine júgine otyryp, biz osy qasıetti aıda úıde otyryp ta kóptegen ǵıbadat, qulshylyǵymyzdy, qaıyrly, izgi amaldarymyzdy júzege asyrýǵa múmkindigimiz kóp», – dedi Nur-Múbárak Egıpet ıslam mádenıeti ýnıversıtetiniń prorektory Qaırat QURMANBAEV.

Óz qajettiligin qospaǵanda 127 myń teńgesi bar adam Ramazan aıynda ózi jáne januıasy úshin pitir sadaqasyn berýi – mindet. Pitir sadaqasy pendeniń oraza kezinde jiberip alǵan qate-kemshilikteriniń orynyn toltyrýǵa kómektespek. Al odan jınalǵan qarjy muqtaj jandardy materıaldyq qoldaý maqsatynda jumsalatyn bolady.

Meshitterde ázirge namaz oqý ýaqytsha toqtatylǵanymen, qulshylyq jasaýǵa eshnárse kedergi emes. Endi pitir sadaqany berý úshin mynadaı jáshik izdep meshitke sabylýdyń esh qajeti joq. Qalta telefonyńyzdan Kaspı qosymshasy arqyly aqsha aýdarýyńyzǵa bolady. Onyń nusqaýlyǵyn mýftıattyń resmı paraqshasynan taba alasyz. Bıyl jan basyna belgilengen pitir sadaqanyń mólsheri 370 teńge.