Qazaqstanda tótenshe jaǵdaı kezinde 1,6 mıllıonnan astam nesıe alýshy qaryzdarynyń merzimin keıinge shegergen. Bul týraly QR Qarjy naryǵyn retteý jáne damytý agenttigi habarlady.

"QR Qarjy naryǵyn retteý jáne damytý agenttigi halyq pen bıznesti qoldaý jónindegi sharalardyń oryndalý monıtorıńin jalǵastyrýda. 2020 jylǵy 28 sáýirdegi jaǵdaı boıynsha ekinshi deńgeıdegi bankterge jáne ózge de kredıttik uıymdarǵa qaryzdar men mıkrokredıtter boıynsha tólemderdi toqtata turýǵa 1 844 599 ótinim kelip tústi. Onyń ishinde 1 831 489 jeke tulǵa banktik qaryz tólemderi boıynsha merzimin keıinge qaldyrýǵa ótinim berdi, 13 110 shaǵyn jáne orta kásipkerlik sýbektisi tótenshe jaǵdaı kezeńinde kredıtter boıynsha merzimdi keıinge shegerýge ótinim berý úshin kredıttik uıymdarǵa júgindi" delingen habarlamada.

Osy oraıda 1 661 232 jeke tulǵanyń 237,4 mlrd teńgesi nemese qaryz alýshylardyń 31,3 paıyzy boıynsha tólemdi toqtata turý maquldandy. Onyń ishinde 299 363-i halyqtyń áleýmettik jaǵynan osal tobynyń ókili.

"Sonymen birge, 11 561 shaǵyn jáne orta kásipkerlik sýbektisi 138,8 mlrd teńge somaǵa nemese kásipkerlerdiń jalpy sanynan 44,1 paıyzy nesıe merzimin keıinge shegerdi. Qalǵan ótinimder qaralyp jatyr, 10 jumys kúni ishinde olar boıynsha tıisti sheshim qabyldanady" dep atalyp ótken habarlamada.

Búgingi kúni shamamen 5,3 mln azamattyń 4,4 trln teńge somaǵa, sondaı-aq 26,2 myńǵa jýyq shaǵyn jáne orta kásipkerlik sýbektisiniń 3,9 trln teńge somaǵa banktik qaryzdar men mıkrokredıtter boıynsha bereshegi bar.

Tótenshe jaǵdaı engizilgennen beri «Qazaqstannyń Halyq banki» AQ qashyqtan 564 615, Kaspi Bank – 358 884, Forte Bank AQ – 26 745, «Bank Sentr kredıt» AQ - 25 258 tólem kartochkasyn ashqan.

«Qazpochta» AQ 88 397 tólem kartochkasyn úıge jetkizip bergen.