Ońtústik Koreıanyń Ichhon qalasynda logıstıkalyq qoımanyń qurylys alańynda órt bolyp eki qazaqstandyq azamat qaıtys bolǵan. Bul týraly Syrtqy ister mınıstrliginiń resmı ókili Aıbek Smadıarov Telegram-da málimdedi. 

– 2020 jyldyń 29 sáýirinde Ońtústik Koreıanyń Ichhon qalasyndaǵy logıstıkalyq qoımanyń qurylys alańynda órt bolyp, 38 adam qaıtys boldy. Taǵy 10 adam jaraqat aldy. İzdeý jumystary áli de júrgizilip jatyr. Jergilikti bılik málimetinshe, 38 adamnyń 29-y kim ekeni anyqtaldy. Onyń ishinde eki Qazaqstan azamaty bar. Bizdiń dıplomattar Seýlmen baılanysta. Taǵy 9 adamnyń kim ekeni anyqtalyp jatyr, jumystar júrgizilip jatyr, – dedi Aıbek Smadıarov.

Jalyn bes saǵattan soń sóndirildi. Jergilikti bılik órtke qurylys jumystary kezinde ýretan jarylýy sebep bolǵan dep sanaıdy.