Túrkistan oblysynda polıseıler tótenshe jaǵdaı kezinde 700-ge jýyq quqyqbuzýshylyqty anyqtap, 93 turǵyndy qamaýǵa aldy. Bul týraly polısıa departamentiniń facebook paraqshasynda habarlandy.

Túrkistandyq polıseıler tótenshe jaǵdaı kezinde tártipke baǵynbaı, zańǵa qaıshy óreskel áreket jasaýshylardy anyqtady. Atap aıtsaq, oblys boıynsha QR Ákimshili quqyq buzýshylyq týraly kodeksiniń 476-baby (Tótenshe jaǵdaı rejımin buzý) boıynsha 693 jaıt anyqtaldy.

Onyń ishinde 206 turǵynǵa sottyń sheshimimen ákimshilik aıyppul (5 461 060tg) salyndy. 226 azamatqa eskertý berilip, 93 azamat ákimshilik qamaýǵa alyndy. Qazirgi ýaqytta sotta 168 is qaralý ústinde.

Bul quqyqbuzýshylyq jasaǵan azamattardyń biri 19-sáýirden bastap oblys boıynsha karantın engizilgenine qaramastan, Túrkistan qalasynda kóshe boıynda ornalasqan asqanalardyń birinde azamattardy qabyldap, tamaqtanýǵa ruqsat bergeni úshin jaýapqa tartyldy.

Ordabasy APB-niń jeke quram qyzmetkerleri de tótenshe jaǵdaıǵa baılanysty kúsheıtilgen rejımde qyzmet atqarýda. Kúndelikti tekserý jumystary barysynda Ordabasy aýdanynda Shubarsý eldi mekeninde ornalasqan avtokólik jýý orny shekteýlerge qaramastan jumys istep turǵany belgili boldy.

Atalǵan jaıt boıynsha avtokólik jýý ornynyń egesine qatysty QR Ákimshilik quqyq buzýshylyq týraly kodeksiniń 476-baby ıaǵnı (Tótenshe jaǵdaı rejımin buzý) boıynsha hattama toltyrylyp, sot qaraýyna joldandy.

Túrkistan oblysy polıseıleri azamattarǵa belgilengen shekteýlerdi qatań saqtap, tártipke baǵynyńyzdar dep keńes beredi.