«Biryńǵaı jınaqtaýshy zeınetaqy qory» AQ-nyń Basqarma tóraǵasy Janat Qurmanov kimdiktiń baspasóz ortalyǵynda ótken onlaın brıfıńte zeınetaqy qoryndaǵy jınaqtar turaqty ári ol oń ınvestısıalyq tabystylyqqa ıe ekendigin aıtty. Bul týraly Almaty qalasy ákimdiginiń baspasóz qyzmeti habarlady. 

Brıfıń barysynda Janat Qurmanov zeınetaqy aktıvteriniń ınvestısıalyq kirisine baılanysty ótken jıynda spıker turǵyndar tarapynan jıi qoıylatyn suraqtarǵa jaýap berdi.

– Sońǵy ýaqytta álemdik qarjy naryǵynda álemdi jaılaǵan qaýipti indet pen munaı baǵasynyń ózgerýine baılanysty birqatar jaǵymsyz oqıǵalar oryn aldy. Bul rette turǵyndar "zeınetaqy qoryndaǵy jınaqtarymyz azaıyp kete me?" degen suraqtardy jıi qoıady. Bizdiń aıtpaǵymyz, alańdaýǵa esh negiz joq. Zeınetaqy qoryndaǵy jınaqtar turaqty ári ol oń ınvestısıalyq tabystylyqqa ıe, – dep atap ótti J.Qurmanov.

Spıkerdiń aıtýynsha, zeınetaqy jınaqtaryna esepteletin taza ınvestısıalyq tabys turaqty túrde ósip keledi. Osylaısha 2020 jyldyń birinshi toqsanynda ınvestısıalyq tabys 661,7 mlrd tg boldy. 2020 jyldyń 1 sáýirine zeınetaqy aktıvteri 11,7 trln tg qurap, 8%-ǵa ósti.

Jalpy 2019 jyldyń sáýirinen 2020 jyldyń naýryzyna deıingi sońǵy 12 aıdaǵy zeınetaqy aktıvteriniń tabysy 11,87%-dy qurady. Al ınflásıa 6,4% boldy. Osylaısha tabystylyq ınflásıadan 5,5%-ǵa asyp tústi.

– Alańdaýǵa esh negiz joq. Óıtkeni "QR zeınetaqymen qamsyzdandyrý týraly" Zańǵa sáıkes memleket azamattarǵa olardyń zeınetaqy jınaqtarynyń ınflásıadan qorǵalýyna kepildik beredi. Bir sózben aıtqanda, memleket salymshy zeınetke shyqqan kezde zeınetaqy jınaqtary azaıyp qalsa ony ótep beredi. Biraq bul shara jınaqtalǵan ınflásıa deńgeıi, ınvestısıalaýdyń barlyq jyldarynda alynǵan tabystan asyp ketken jaǵdaıda ǵana júzege asyrylady, – dep qorytyndylady sózin J. Qurmanov.