Jambyl oblysynda 43 naýqas koronavırýstan jazylyp, aýrýhanadan shyǵaryldy. Bul týraly Jambyl oblysy ákiminiń orynbasary Erjan Jylqybaev óńirlik komýnıkasıalar qyzmetindegi brıfıńte aıtty.
Oblysta jalpy 113 adam indet juqtyrǵan. Búginge deıin 1784 adam karantınnen shyǵaryldy.
– Jambyl oblysynda koronavırýs juqtyrǵandardy anyqtaý úshin 6 loboratorıa jumys istep tur. Búgingi kúni koronavırýs indetine testileýden 6700 adam ótti, – dedi Erjan Jylqybaev.
Onyń sózinshe, oblys aýmaǵynda ornalatylǵan barlyq 48 blokpost jumysy kúsheıtilgen.
Sondaı-aq ol oblys turǵyndaryna arnalǵan áleýmettik qoldaý sharalary týraly aıtty.
– Jambyl oblysy boıynsha 119 000 turǵynnyń 15 000 teńge kóleminde komýnaldyq shyǵyndary óteletin bolady. 2020 jyly keminde 30 myń jumys orny ashylady. Oblys aýmaǵynda 831 ınfraqurylymdyq jobany iske asyramyz, – dedi oblys ákiminiń orynbasary.
Sondaı-aq Qordaı aýdany boıynsha 141 jobaǵa 12 mlrd teńge qarjy bólinbek.
Erjan Jylqybaev turǵyndardy koronavırýstyń taralýyn toqtatý sharalaryna túsinikpen qaraýǵa shaqyrdy.
– Elimiz úshin qıyn qystaý zamanda, batyr Baýyrjan Momyshuly babamyzdyń "Tártipsiz el bolmaıdy, tártipke bas ıgen qul bolmaıdy" degen sózin esten shyǵarmaǵanymyz abzal. Jergilikti atqarýshy jáne quqyqqorǵaý organdary, densaýlyq saqtaý uıymdary tarapynan qabyldanyp jatqan indettiń aldyn alý úshin qabyldanǵan sharalarǵa túsinistikpen qarap, karantın rejımin buzbaýǵa shaqyramyn. Ol úshin úıde bolýlaryńyzdy suraımyn. Ótpeli kezeńde, qıyndyqty birge jeńemiz!, – dedi ol brıfıń barysynda.
Jambyl oblysy ákiminiń baspasóz qyzmeti
Pikir qaldyrý