Memleket basshysy Q.Toqaev Túrkistan oblysyndaǵy sý basqan aýyl turǵyndaryna kómek kórsetýdi tapsyrdy.

"Ózbekstandaǵy sý qoımasy bógetiniń buzylý saldarynan Túrkistan obl. Jeńis jáne Jańa turmys aýyldaryn sý basty. Búgin PM A.Mamın men oblys ákimi Ó.Shókeev aýyl turǵyndaryn evakýasıalaý boıynsha qabyldanǵan sharalar týraly baıandady. Zardap shekken otbasylarǵa kómek kórsetýdi tapsyrdym, delingen prezıdenttiń twitter-degi jazbasynda.

Keshe, 1 mamyrda Ózbekstandaǵy Sardoba sý qoımasynyń bógeti nóser jańbyr men qatty jel saldarynan jarylyp, Túrkistan oblysy Maqtaaral aýdanynyń Jańa turmys, Jeńis, Nurly jol aýyldaryn sý basqan.

Eldimekenderdiń 5400 turǵyny aýdan ortalyǵy Myrzakentte ornalasqan Myrzakent mektep-gımnazıasyna, S.Rahymov atyndaǵy jalpy orta mektebine, Pýshkın, Abylaıhan orta mektepterine evakýasıalanǵan.

Eldimekenderden turǵyndardy kóshirýge 450 polıseı jumyldyryldy. Halyqty evakýasıalaý úshin Maqtaaral, Jetisaı jáne Saryaǵash APB jeke quramy men Ulttyq ulannan 250 áskerı atsalysty.

Apattyq-qutqarý jumystaryna tótenshe jaǵdaılar departamentiniń jeke quramynan 138 adam, 8 tehnıka tartylǵan. Ulttyq gvardıanyń 6506 bólimshesinen 300 adam, 300 oryndyq 6 avtobýs, 120 oryndyq 4 KamAZ, aýdandyq polısıa bóliminen 7 tehnıka jáne 70 qyzmetker kómekke kelgen. Al jergilikti atqarýshy organnan 40 qyzmetker, 5 tehnıka tartyldy.