Qyzylorda oblysynda 30 jastaǵy naýqas koronavırýs indetinen emdelip shyqty. Ol aýrýdan aıyqqan 1000-naýqas bolyp otyr. Bul týraly QR Densaýlyq saqtaý mınıstri Eljan Birtanov Facebook paraqshasynda jazdy.

– Dostar, jaqsy jańalyqpen bóliskim keledi! Búgin stasıonardan COVID -19 dertine shaldyqqan 1000-shy naýqas emdelip shyqty. Ol Qyzylorda oblysynda emdelip jatqan 30 jastaǵy adam. Ol Qyzylorda oblystyq juqpaly aýrýlar aýrýhanasyna 16 sáýirde koronavırýs ınfeksıasyn juqtyrǵan adammen baılanysta bolǵandyqtan túsken. Onyń jaǵdaıy ortasha aýyr bolǵan. Dene qyzýy 38 gradýsqa deıin kóterilip, qurǵaq jótel jáne álsizdik bilindi. Onyń ókpesin rentgenge túsirgen kezde sol jaq ókpesiniń ınterstısıaldy qabynýy bolǵany anyqtaldy, – deıdi Eljan Birtanov.

Oǵan «COVID-19 koronavırýs ınfeksıasy, sol jaq ókpeniń qabynýy, ortasha aýyr deńgeı» dıagnozy qoıylǵan.

– Emdeý COVID-19-dy emdeý jáne dıagnostıkalaý protokolyna sáıkes júrgizildi. Emdelgennen keıin araǵa 24 saǵat salyp eki ret koronavırýsqa zerthana tekserý jumysy júrgizildi. Test nátıjesinde koronavırýstan emdelgeni anyqtaldy. Stasıonardan shyǵar kezde eshqandaı shaǵymy bolǵan joq. Dárigerler ony 21 kún úıde karantınde otyrý usynymymen shyǵardy. Men aldyńǵy shepte júrgen dárigerlerge alǵys aıtqym keledi. Jaraısyzdar! Rahmet, – deıdi mınıstr.