Búgin Májilistiń jalpy otyrysynda «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýsıalyq zańyna tolyqtyrýlar engizý týraly» Konstıtýsıalyq zańynyń jobasy maquldandy. Osyǵan oraı, tanymal qazaqstandyq saıasattanýshy, «Birgemiz» qoǵamdyq qory qamqorshylyq keńesiniń múshesi Erlan Saırov pen QR Prezıdenti janyndaǵy Ulttyq qoǵamdyq senim keńesiniń múshesi Marat Shıbutov Qazaqparatqa Memleket basshysynyń parlamenttik opozısıa ınstıtýty bastamasy jónindegi pikirlerimen bólisti.

«Bul QR Prezıdenti Qasym-Jomart Kemeluly Toqaevtyń Ulttyq senim keńesi aıasynda usynǵan saıası reformalar toptamasynyń biri. Bul toptama aýqymdy ári ekijaqty mánge ıe. Birinshiden, opozısıanyń destrýktıvti emes ekendigi aıtylady. Opozısıa - bul elimizdiń damý maqsattaryna qol jetkizýdegi memleket seriktesi. Qundylyq deńgeıinde munyń óte úlken máni bar», - dedi Erlan Saırov.

Onyń aıtýynsha, ekinshiden, zańnamalyq deńgeıde opozısıalyq qyzmet pen parlamenttik azshylyq qyzmetine kepil bekitiledi.

«Iaǵnı, Parlament ishinde belgili bir artyqshylyqqa, sonymen qatar parlamenttik azshylyq ókiliniń naqty bir laýazymdy ıelenýine kepildik beriledi. Bul álemdik tájirıbe sanalady. Sondyqtan Qazaqstan búgingi kúni saıası reformalardy ilgeriletýde demokratıanyń halyqaralyq standarttaryna saı keledi dep aıtýǵa bolady. Qazirgi ýaqytta biz dál soǵan qaraı kele jatyrmyz», - dedi saıasattanýshy.

Al Marat Shıbutov parlamenttik opozısıa ınstıtýty jaıynda uzaq ýaqyttan beri aıtylyp kele jatqandyǵyn eske salyp ótti.

«Ulttyq qoǵamdyq senim keńesi aıasynda bul ıdeıa jandana tústi. Biz de bul jaıynda bastama kótergen edik. Alaıda depýtat Azat Perýashev bul zańdy ázirlep shyqty. Árıne, bul quqyqtardyń munan da kóp bolǵanyn qalaǵanymyzben osynyń ózi de táýir. Árbir partıa bir komıtet basshylyǵyna ıe bolǵanyn qalar edim. Bul jerde bir tóraǵa laýazymy men komıtetterdiń 2 hatshylyq laýazymy jaıynda ǵana aıtylǵan. Munyń ózi de jap-jaqsy. Bir sesıada parlamenttik tyńdaýǵa bastamashylyq jasaý da durys. Bul Parlamenttegi opozısıalyq partıanyń múmkindikterin aıtarlyqtaı arttyra túser edi. Bul - demokratıaǵa qaraı qadam», - dedi QR Prezıdenti janyndaǵy Ulttyq qoǵamdyq senim keńesiniń múshesi.

Esterińizge sala ketsek, búgin Májilistiń jalpy otyrysynda «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýsıalyq zańyna tolyqtyrýlar engizý týraly» Konstıtýsıalyq zańynyń jobasy maquldandy.

Zań jobasynyń negizgi maqsaty - qoldanystaǵy zańnamada «parlamenttik kópshilik» jáne «parlamenttik opozısıa» uǵymdaryn bekitý boıynsha quqyqtyq negizderdi qamtamasyz etý. Máselen, parlamenttik opozısıaǵa qandaı da bir másele boıynsha óz ustanymyn bildirýge kepildik berý maqsatynda zań jobasynda saıası partıalar fraksıalary basshylarynyń Parlament Palatalarynyń birlesken otyrystarynda, Parlament Májilisiniń jalpy otyrystarynda, turaqty komıtetterdiń, jumys toptarynyń otyrystarynda, parlamenttik tyńdaýlar men ózge de is-sharalarda sóz sóıleýge kepildik berilgen quqyǵyn bekitý kózdeledi.