9 mamyr kúni Ál-Farabı atyndaǵy Qazaq ulttyq ýnıversıteti Fılosofıa jáne saıasattaný fakúlteti Dintaný jáne mádenıettaný kafedrasynyń dosenti, fılosofıa ǵylymdarynyń doktory Beısenov Baǵdat Qabyldauly qaıtys boldy.

Baǵdat Beısenov 1968 jyly 14 naýryzda Túrkistan oblysy Otyrar aýdany Sháýildir aýylynda dúnıege kelgen.

Ol 1996 jyly ál-Farabı atyndaǵy Qazaq ulttyq ýnıversıteti fılosofıa bóliminiń bakalavrıatyn támámdaǵan. 

1998-2000 jyldary ál-Farabı atyndaǵy QazUÝ fılosofıa jáne saıasattaný fakúltetiniń aspırantýrasynda oqyǵan.

2001-2010 jyldary ǵylym fılosofıasy jáne dintaný kafedrasynyń asıstenti, oqytýshysy, aǵa oqytýshysy, dosenti qyzmetin atqarǵan.

2002 jyly fılosofıa tarıhy mamandyǵy boıynsha "Máshhúr Júsip Kópeıulynyń áleýmettik fılosofıasy" taqyrybynda kandıdattyq dısertasıa qorǵady.

2004 jyly memlekettik "Mádenı mura" baǵdarlamasyna aýdarmashy retinde qatysqan.

2010 jyly dintaný, fılosofıalyq antropologıa, mádenıet fılosofıasy mamandyǵy boıynsha "Qazaq rýhanıatyndaǵy ıslam qundylyqtary" atty doktorlyq dısertasıany tabysty qorǵaǵan.

1 oqý quralynyń, tıptik baǵdarlamalardyń avtory, 5 oqý quralynyń soavtory. 70-ten astam ǵylymı maqala jazǵan. 

"Ulttyq qaýipsizdik aıasyndaǵy dinı aıqyndalý máselesi" (2007-2009 jj.), "Ulttyq ıdeıa aıasyndaǵy Qazaqstandaǵy dinder" (2008 j.), "Qazirgi zamandaǵy dinniń róli" (2011 j.) sekildi QR BǴM tarapynan bólinetin irgeli jobalar aıasynda ǵylymı qyzmetker retinde ǵylymı zertteýlermen aınalysty.

Beısenov Qabyldauly fakúltet pen kafedra tarapynan tapsyrylǵan qoǵamdyq jumystardy jaýapkershilikpen, ýaqytynda atqardy. Ǵylymı-zertteý jumysyn ustazdyq qyzmetpen sabaqtastyra biletin, jaýapkershiligi mol, áriptesteri arasynda qurmetke ıe qyzmetker bolǵan.

Ál-Farabı atyndaǵy Qazaq ulttyq ýnıversıteti Fılosofıa jáne saıasattaný fakúltetiniń ujymy Beısenov Baǵdat Qabyldaulynyń dúnıeden ozýyna baılanysty marqumnyń otbasy men týystaryna qaıǵyryp, kóńil aıtady.