Almaty qalasynyń memlekettik bas sanıtarlyq dárigeri Jandarbek Bekshın koronavırýspen aýyrǵandardyń 92%-y juqtyrǵandarmen baılanysta bolǵan adamdardyń ishinen anyqtalǵanyn málim etti.

Qala boıynsha búgingi kúni COVID-19-dyń rastalǵan 1578 jaǵdaıy tirkelgen. 8 mamyrda koronavırýs ınfeksıasyn juqtyrǵan 108 jaǵdaı tirkeldi. Qaýipti indetpen aýyrǵandardyń 92%-y juqtyrǵandarmen baılanysta bolǵan adamdardyń ishinen anyqtalǵan. Sebebi, mamandar vırýs juqtyrǵandarmen qarym-qatynasta bolǵandardy jedel, der kezinde baqylaýǵa alyp otyr.

Naýqastardyń 7%-y skrınıngten ótken kezde, 1%-y medısınalyq kómekke júgingen kezde josparly emdeýge jatqyzý aldynda anyqtalǵan.

Qazirgi tańda qalada profılaktıkalyq skrınıng ádisi engizilgen. Bul – koronavırýstyq ınfeksıany jedel ári sapaly, dál anyqtaıtyn zamanaýı ádis.

– Mundaı ádis engizilgennen beri, mysaly, ótken sáýir aıynda koronavırýstyq ınfeksıany juqtyrý deńgeıi táýligine 6%-dan aspaǵandyqtan, qala ekonomıkasyn kezeń-kezeńimen qalpyna keltirý strategıasy júzege asyryla bastady. Karantınnen qaýipsiz shyǵý úshin Almatyda ınfeksıanyń jasyryn oshaqtaryn belsendi anyqtaý maqsatynda jappaı testileý júrgizilýde.

Profılaktıkalyq skrınıng ádisiniń bergen taǵy bir jaqsy nátıjesi, 75% naýqastyń boıyndaǵy qaterli ınfeksıa sımptomsyz, óte jeńil kezeńinde anyqtaldy. Bul, árıne, syrqattyń asqynýynyń aldyn alady jáne tez saýyǵyp ketýine múmkindik mol. Ekinshiden, bul skrınıng bizge jasyryn indet oshaqtaryn da jedel anyqtaýǵa kómektesip jatyr.

Bir kúnde anyqtalǵan 108 naýqastyń bári karantınde otyrǵan adamdarmen baılanysta bolǵandar. Iaǵnı, olar syrtqy ortadan, úıinen nemese jumys ornynan juqtyryp kelmegender. Biz ol deńgeıge jetkizbedik, – dedi J. Bekshın.

Sáýir aıynda sanıtarlyq-epıdemıologıalyq baqylaý sharalaryn kúsheıtý jáne testileý kontıngentin keńeıtý nátıjesinde juqtyrý oshaqtary anyqtaldy. Baılanysta bolǵan barlyq adam dereý oqshaýlandy. Búgingi kúni juqtyrý jaǵdaılary osy toptaǵy oqshaýlandyrylǵan adamdardyń arasyndaǵy anyqtalýda, demek, ınfeksıanyń odan ári taralý joly kesildi.

Qalanyń bas sanıtarlyq dárigeriniń sózinshe, PSR dıagnostıkasynyń aýqymy, ıaǵnı kontıngenti keńeıtilgen.

– Bastapqy kezeńde PSR-test júrgizetin 2 zerthana bolǵan, al qazir olardyń sany 6-ǵa jetti. Bul koronavırýstyq ınfeksıanyń jolyn kesý úshin úlken kúsh dep bilemiz. Nátıjesinde ózge aımaqtarmen salystyrǵanda almatylyqtardyń PSR-testten ótý kórsetkishi, ıaǵnı qamtylý deńgeıi respýblıka boıynsha alǵashqy orynda tur.

Almatyda osy ýaqytqa deıin jalpy 85 myńǵa jýyq adam koronavırýs ınfeksıasyn anyqtaý testinen ótti, onyń ishinde 61-myńy PSR ádisimen, al 24 myńy eksperss-test boıynsha.

PSR-dıagnostıka qazirgideı syn shaqta bizge eń sapaly ári jedel, dál nátıje berip otyrǵanyn bas aıta keteıin, – dedi Bekshın.