Memleket basshysy Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komısıanyń qorytyndy otyrysynda shaǵyn, orta, iri kompanıalar jańa erejelerge sáıkes jumys isteýi kerektigin aıtty.

"Áleýmettik araqashyqtyqty saqtaý, kópshilik jınalǵan jerde betperde taǵyp júrý qalypty jaǵdaıǵa aınalýǵa tıis. Oblystar arasyndaǵy kólik qatynasyna qatysty shekteýler qala beredi. Qoǵamdyq kólikter jartylaı júktememen jumys isteıdi. Jolaýshylardan betperde taǵý talap etiledi. Kóshede toptasyp júretinder 3 adamnan aspaýy kerek. Memlekettik qyzmetshilerdiń 50 paıyzy qashyqtan jumys isteı beredi. Jeke kásiporyn basshylary qansha qyzmetkerdi jumysqa shyǵaratynyn ózderi anyqtaýǵa tıis, – dedi prezıdent.

Toqaev indettiń ekinshi kezeńi bastalyp ketýi múmkin ekenin aıtty.

– Jurttyń kóbi áli de úıde otyra turǵany durys bolar edi. Bul – eń aldymen, adamdardyń qaýipsizdigine baılanysty másele. Jumys ornynda áleýmettik araqashyqtyq jáne qatań sanıtarlyq rejım saqtalýy qajet. İndettiń ekinshi kezeńi bastalyp ketýi múmkin. Sondyqtan, ózimizdiń aman-saýlyǵymyzǵa, eń aldymen, ózimiz jaýapty bolýymyz kerek. İndet qaıta órshigen jaǵdaıda Úkimet naqty shuǵyl is-qımyl josparyn daıyndaıdy, – Toqaev.