QR Premer-Mınıstriniń birinshi orynbasary Eraly Toǵjanov oıyn-saýyq ortalyqtarynyń qashan ashylatynyn túsindirdi, dep habarlaıdy QazAqparat.
– Búgin Prezıdent Qasym-Jomart Toqaev 2 myń sharshy metrge deıingi azyq-túlikten bólek dúkenderdiń, sulýlyq salondarynyń jáne balalardy damytý ortalyqtarynyń ashylatynyn málimdedi. Turǵyndardyń saıabaqtar men skverlerde serýendeýine ruqsat beriledi. Park janyndaǵy kóńil kóterý jumystaryna shekteý qoıylady, – dep túsindirdi E. Toǵjanov brıfıńte.
Sonymen birge, E. Toǵjanov oıyn-saýyq ortalyqtarynyń jumysyn jandandyrý boıynsha kóp suraq kelip túskenin aıtty.
– Bul kezeńde oıyn-saýyq ortalyqtarynyń, meıramhanalar men qonaq úılerdiń jumysy iske qosylmaıtynyn málimdeımin. Bul másele sál keıinirek óńirlerdegi sanıtarlyq-epıdemıologıalyq jaǵdaıdy eskere otyryp, qarastyrylady, – dedi E. Toǵjanov.
Onyń aıtýynsha, eldegi KVI juqtyrǵandar úlesin 2 paıyzǵa deıin azaıtqanda ǵana, oıyn-saýyq ortalyqtaryn ashýǵa múmkindik bar.
Sondaı-aq ol Qazaqstanda temirjol kóliginiń qozǵalysy áli ashylmaıtynyn, tótenshe jaǵdaı rejıminiń toqtaǵanyna qaramastan blokposttar áli de saqtalatynyn aıtty.