QR eńbek jáne halyqty áleýmettik qorǵaý mınıstri Birjan Nurymbetov Ortalyq komýnıkasıalar qyzmetinde ótken onlaın brıfıńte 11 mamyrǵa deıin 42 500 teńgege ótinish bergen azamattardyń ótinishteri mindetti túrde qaralyp, taǵaıyndalatynyn atap aıtty.

– 42 500 teńge mólsherindegi tólem – TJ rejımindegi shekteýlerge baılanysty tabysynan, jalaqysynan aıyrylǵan jaǵdaıda tólenedi. Búgingi kúnge deıin 4 mln 539 myń adamǵa tólem taǵaıyndalyp, tólendi. Buǵan 193 mlrd teńge jumsaldy. Onyń ishinde tótenshe jaǵdaıdyń birinshi aıynda, ıaǵnı 16 sáýirge deıin ótinishterin ótkizgender – 3 mln 735 myń adam. Osy adamdar ekinshi aıda da tólem alýǵa quqyly. Ol tólemderdi mamyr aıynan bastap iske asyra bastadyq. Demalystyń aldynda 5-6 mamyr kúni 2 mln-ǵa jýyq adamnyń sheshimin rásimdep, 99 mlrd teńge bankterge jiberdik. Biraz azamat alyp úlgerdi. Bul tólemder basqa adamdarǵa ıaǵnı qalǵandaryna da beriledi, – dep aıtty B. Nurymbetov.

Mınıstr 11 mamyrdan keıin 42 500 teńgege jańadan berilip jatqan ótinishterdiń qabyldaýy toqtatylatynyn  atap aıtty.

– 11 mamyrda tótenshe jaǵdaıdyń merzimi aıaqtalýyna qaraı 42 500 teńgege jańadan berilip jatqan ótinishterdiń qabyldaýy toqtatylady. Biraq 11 mamyrǵa deıin ótkizilgen ótinishterdiń barlyǵy mindetti túrde qaralyp, erejege sáıkes bolsa taǵaıyndalyp, tólenetin bolady, – dedi mınıstr.