Dýbaıda jumys istep júrgen qazaqstandyq azamatsha jumbaq jaǵdaıda kóz jumdy. Jergilikti polısıa otandasymyzdyń óz-ózine qol jumsaǵanyn aıtýda. Alaıda marqumnyń týystary munymen kelispeıdi. Ýmıda Sabyrova mektepti úzdik tamamdaǵan. Onyń ústine jeńil atletıkamen kásibı túrde aınalysqan eken. Aǵylshyn tilin úırenip, ótken jyldyń tamyz aıynda Birikken Arab Ámirlikterine jumys isteýge ketken. Ápkesi Manzýra Sabyrovanyń sózinshe, Ýmıda ol jaqta oqýyna aqsha jınap, jaqyndaryna da qarjylaı kómektesken. Bul týraly Eýrazıa birinshi arnasy habarlaıdy.

– Sińilimniń múrdesin elge jetkizse deımin. Ushaqtar ushyp jatyr emes pe?! Meni kórip tursańyzdar, barlyq elshilerden, bizdiń Prezıdentimizden kómek suraımyn!, - deıdi Ýmıda Sabyrovanyń ápkesi Manzýra Sabyrova. 

Manzýra Sabyrova sińilisiniń óz ómirin qıǵanyna senbeıdi. Oǵan sebep te joq emes. 16 naýryzda baılanysqa shyqqan Ýmıda ózin shetelden alyp ketýdi ótinip, báz-bireýlerdiń ony ańdyp júrgenin aıtqan. Pandemıanyń taralýyna baılanysty ol kezde qandaı da bir shara qabyldaý múmkin bolmapty. Al elimizdiń syrtqy ister mınıstrligi osy jaǵdaıdy baqylaýda ustap otyrǵandaryn aıtady. Resmı organ "Múrdeni elge jetkizý máselesi osy aptanyń sońyna deıin sheshilýi tıis", dep jaýap berdi.