Qasym-Jomart Toqaev Almatyda qolǵa alynǵan birqatar ınfraqurylymdyq jobamen tanysty, - dep habarlaıdy Qamshy.kz aqparat agenttigi Aqordaǵa silteme jasap.

Memleket basshysy Almaty qalasyna jumys sapary barysynda júzege asyrylyp jatqan ınfraqurylymnyń jobalarymen tanysty.

Qazaqstan Prezıdentine Almatynyń halyqaralyq áýejaıyn qaıta jóndeý jospary tanystyryldy.

Túrkıanyń TAV airport Holding kompanıasy bas dırektorynyń orynbasary Serkan Kaptan Qasym-Jomart Toqaevqa áýejaıdyń jańa termınalynyń qurylysy týraly málimet berdi. Jalpy kólemi 55 myń sharshy metr bolatyn termınal jobasynyń quny 150 mıllıon evro. Termınal jylyna 6 mıllıon jolaýshyǵa qyzmet kórsetedi.  Atalǵan nysannyń qurylysy 2022 jyldyń 2-toqsanynda aıaqtalady dep josparlanýda. 

Qasym-Jomart Toqaev Almaty qalasynyń halyqaralyq áýejaıy qaıta jóndeýden ótkennen keıin bul nysannyń Ortalyq Azıa aımaǵyndaǵy iri avıasıalyq habqa aınalatynyna senim bildirdi.

Sonymen qatar Qazaqstan Prezıdenti Buqtyrma kóshesi men Qulja traktisiniń qıylysynda salynatyn uzyndyǵy 784 metrlik kólik jolaıryǵy qurylysynyń jobasymen tanysty.

Memleket basshysynyń aıtýynsha, atalǵan joba qala joldaryndaǵy keptelisti azaıtýǵa jáne turǵyndardyń tirshiligine qolaıly jaǵdaı týǵyzýǵa múmkindik beredi.