Prezıdent usynǵan damý strategıasyn zańnamalyq turǵyda sapaly ári ýaqytyly qamtamasyz etýimiz kerek. Bul týraly búgin QR Parlamenti Senatynyń tóraǵasy Máýlen Áshimbaev aıtty.

– Ózderińizge belgili, osy aptada elimizde tótenshe jaǵdaı rejımi aıaqtaldy. Soǵan baılanysty memleket basshysy daǵdarystan keıingi damýdyń basym baǵyttaryn anyqtap berdi. Jalpy, elimizde indetpen kúres jumystary júıeli júrgizildi. Prezıdentimizdiń tapsyrmasy men der kezinde qajetti sheshimder qabyldanyp, naqty sharalar júzege asyryldy. Ortalyq jáne jergilikti memlekettik organdar óz mindetterin tıisti deńgeıde oryndady. Sonyń arqasynda elimizde vırýstyń jappaı taralýyna jol berilmedi. Azamattardyń qabyldanǵan shekteýlerge túsinistikpen qaraýy da prezıdent sheshimderiniń nátıjeli bolýyna oń áserin tıgizdi. Qazir jaǵdaı aıtarlyqtaı turaqtandy. Degenmen, dertten áli de bolsa tolyq arylǵan joqpyz. Sondyqtan birqatar shekteýler qala beredi. Soǵan oraı saqtyq sharalaryn ustanýymyz kerek, – dedi Máýlen Áshimbaev.

Senat spıkeri koronavırýs indeti kóptegen salaǵa aıtarlyqtaı zardabyn tıgizgenin, soǵan baılanysty elimizde Memleket basshysynyń bastamasymen daǵdarysqa qarsy sharalar júzege asyrylyp jatqandyǵyn basa aıtty. halyqqa jáne bızneske aıtarlyqtaı qoldaý kórsetilip jatqanyn eske saldy.

– Prezıdent bul baǵyttaǵy jumystaryn ary qaraı jalǵastyra beretindigin aıtty. Ásirese azamattardyń densaýlyǵyn saqtaýǵa, olardyń tabysyn arttyrýǵa, bıznesti qoldaýǵa, bilim jáne ǵylym júıesin jetildirýge basa mán berildi. Tótenshe jaǵdaı jónindegi memlekettik komısıa ekonomıkalyq ósimdi qalpyna keltirý jónindegi memlekettik komısıa bolyp qaıta qurylyp, keshendi jospar daıyndalady. Senat osynyń bárin eskerip, óz jumysyn tıimdi uıymdastyrýy tıis. Biz elbasy saıasatynyń sabaqtastyǵyn saqtaı otyryp, prezıdent usynǵan damý strategıasyn zańnamalyq turǵyda sapaly ári ýaqytyly qamtamasyz etýimiz kerek. Memleket basshysy 4 mamyrda Senatta sóılegen sózinde palatanyń eń basty mindeti - sapaly zańdar qabyldaý ekenin atap ótti. Osy baǵytta birlesip nátıjeli jumy isteımiz dep senemin, – dedi senat tóraǵasy.