«Nur Otan» partıasynyń Májilistegi fraksıasy Úkimettiń daǵdarysqa qarsy josparyna birqatar usynystar jasady. Bul týraly Májilis Tóraǵasy, fraksıasy jetekshisi Nurlan Nyǵmatýlın málimdedi.
Otyrysta nurotandyq depýtattar qazirgi tańda Úkimet ázirlep jatqan Ekonomıkalyq ósýdi qalpyna keltirý jónindegi keshendi josparyna fraksıanyń usynystaryn talqylady.
– Memleket Basshysy Qasym-Jomart Kemeluly Toqaevtyń Tótenshe jaǵdaı jónindegi memlekettik komısıanyń qorytyndy otyrysynda sóılegen sózi kópjaqty da mańyzdy is-qımyl baǵdarlamasy bolyp tabylady. Endi barlyq kúsh-jigerdi eń aldymen daǵdarystyń saldaryn eńserýge, ulttyq ekonomıkany qalpyna keltirýge jáne azamattardyń ál-aýqatyn jaqsartýǵa jumyldyrý qajet. «Nur Otan» partıasynyń Májilistegi fraksıasy, árıne, ekonomıkalyq ósý sharalaryn daıyndaýǵa jáne iske asyrýǵa belsendi qatysady. Bizdiń basty mindetimiz – Prezıdenttiń bastamalaryn iske asyrýdy zańnamalyq turǵydan qamtamasyz etý, – dedi Nurlan Nyǵmatýlın.
Ol úshin Májilis depýtattary, «Nur Otan» partıasy fraksıasynyń músheleri «5-10-20» pılottyq jobasyn zańdy túrde qamtamasyz etýdi qarastyrýda.
Sonymen qatar fraksıanyń usynystarynyń qatarynda aýylsharýashylyq ónimderin, onyń ishinde kelisim-sharttyq qarjylandyrý tetigi arqyly kepildendirilgen satyp alý tájirıbesine negizdelgen azyq-túlikpen qamtamasyz etý baǵdarlamasyn qalyptastyrý da bar.
Depýtattar basymdy salalardaǵy strategıalyq ınvestorlardyń turaqtylyǵyn qamtamasyz etý úshin qoldanystaǵy ınvestısıalyq zańnamaǵa qajetti túzetýler engizýdiń mańyzdylyǵyna nazar aýdardy.
«Nur Otan» partıasynyń fraksıasy azamattyq-quqyqtyq kelisimsharttar boıynsha jeke zeınetaqy kiristerinen mindetti zeınetaqy jarnalary mólsherin 10% -dan 5%-ǵa deıin tómendetýdi zańnamalyq túrde qarastyrýdy, sondaı-aq, áleýmettik mańyzy bar taýarlarǵa baǵa belgileý tetigi boıynsha normatıvtik quqyqtyq aktilerdiń saqtalýyn qamtamasyz etýdi usynady.
Osy usynystardyń qatarynda – zańdy tulǵalarǵa jáne jeke kásipkerlerge qatysty aǵymdaǵy jyldyń 1 qazanyna deıin bankrottyq týraly is júrgizýdi toqtata turý úshin zańnamalyq sharalar qabyldaý, zańnamalyq deńgeıde banktik emes nesıelik uıymdardyń mıkroqarjy qyzmetin mindetti lısenzıalaýdy qamtamasyz etý bar.
Nurotandyq-depýtattar týrısik qyzmetti zańnamalyq turǵydan qamtamasyz etýge, Jumyspen qamtýdyń jol kartasynda jastardyń jumys oryndaryn qurýda basymdyqqa mán berýge, epıdemıologtardy, ınfeksıalyq aýrýlar boıynsha mamandardy jáne vırýsologtardy daıarlaýǵa memlekettik bilim berý tapsyrysyn arttyrýǵa erekshe nazar aýdardy.
Pikir qaldyrý