14 mamyrda Nur-Sultanda ortalyq bazardyń 200-den astam satýshysy saýda orny aldyna jınalyp, karantın kezindegi bazar ákimshiliginiń "negizsiz talaptaryna" qarsy shyqty, dep jazady Qamshy.kz aqparat agenttigi Azattyqtyń deregin negizge alyp.

Satýshylardyń aıtýynsha, bazar ákimshiligi aldyn ala eki aıdyń jalǵa alý qunyn tóleýdi talap etip otyr. Aldyńǵy aılarda tabyssyz qalǵanyn aıtqan saýdagerler mundaı aqshany qaıdan tabamyz deıdi. 

“Biz karantın jarıalanǵanǵa deıin 1,5 aıǵa tólegenbiz, onyń aqshasy áli aqtalǵan joq. Endi mamyr men maýsymǵa tólep kiresińder dep jatyr. Nege biz aldyńǵysyn aqtamaı jatyp, taǵy eki aıǵa tóleýimiz kerek?” dedi ashynǵan saýdagerler.

Narazy jurttyń sózine qaraǵanda shamamen eki jarym aı jabyq bolǵan saýda orny jaqyn arada ashylýǵa tıis.

Olardyń kóbi "tym bolmaǵanda býtıktegi taýarlarymyzdy alýǵa ruqsat bersin, basqa jaqqa ketemiz" dep otyr.

Saýdagerler buǵan qosa, bazardaǵy býtıkterdiń jalǵa alý qunynyń qymbattyǵyna shaǵymdandy. Olardyń sózine qaraǵanda, ózge saýda ortalyqtarynda býtıkterdi jalǵa alý quny bir sharshy metrge 4 myń teńgeni qurasa, munda – 6900-7000 teńge. Jınalǵandar bazar ákimshiligi "saýdagerlerdiń pikir-eskertýlerine qulaq aspaıdy" dep te shaǵymdandy.

Bazar ákimshiliginen bir qyzmetker shyǵyp, saýdagerlerdi sabyrǵa shaqyrdy. Alaıda narazy satýshylar bazar basshylyǵy kelýin talap etti. Aıtýynsha, olar buǵan deıin eki ret jınalǵanmen bazar basshylyǵy kelmegen. Budan soń bazar ókilderi árbir qatardan bir satýshyny ishke kirgizip, máseleni talqylaýǵa shaqyrdy. Kelissózge aqparat quraldary áreń kirgizildi.

Oqıǵany polısıa qyzmetkerleri baqylap tur. Munda ákimdik, prokýratýra ókilderi de bar. Qazir saýdagerler men bazar ákimshiligi arasynda kelissóz júrip jatyr.