Mańǵystaýlyq eriktiler korpýsy sý tasqynynan zardap shekken túrkistandyqtarǵa 5 tonnaǵa jýyq gýmanıtarlyq kómek jınady.

Bul  týraly qoǵamdyq komýnıkasıa ortalyǵynda ótken brıfıńte Mańǵystaý oblystyq jastar resýrstyq ortalyǵynyń basshysy Abylaı Fazylbek málimdedi.

Túrkistan oblysynda oryn alǵan tótenshe jaǵdaıdyń alǵashqy kúninde Mańǵystaý oblysyndaǵy barlyq jastar resýrstyq ortalyqtary bazasynda gýmanıtarlyq júk jınaý shtaby quryldy. Nátıjesinde óńirdegi volonterlar korpýsynyń kómegimen 5 tonnaǵa jýyq gýmanıtarlyq kómek jınaldy. Onyń 2 tonnasy oblystyq shtabta, 3 tonna aýdandyq shtabta jınaldy.

Sonymen birge óńirimizdiń iri saýda oryndarynyń aldynan júk kólik júrgizýshileriniń bastamasymen, kásipkerlerdiń kómegimen jınaý pýnkteri jumys jasady. Nátıjesinde el azamattary men qala turǵyndarynyń kómegimen 77,5 tonna gýmanıtarlyq júk jınaldy. Atalǵan gýmanıtarlyq júkti suryptaý jumysyna oblystyq volonterlar korpýsynyń volonterlary jumyldyryldy.

Sonymen qatar, volonterlar korpýsynyń bastamasymen oblys turǵyndaryn ıgi iske jumyldyrý maqsatynda áleýmettik jelide aqparattyq jumys júrgizildi. Infografıkalar jasaqtalyp, onlaın tólem jasaý joldary túsindirildi.

-«Bir jaǵadan bas, bir jeńnen qol shyǵaryp», osyndaı tótenshe ýaqyt kezinde aýyzbirshilik tanytyp, qoldaý bildirgen barsha oblys turǵyndaryna, júk kólik júrgizýshilerine, kásipkerlerge, jastar men volonterlarǵa óz alǵysymyzdy bildiremiz», deıdi Abylaı Fazylbek.