Atyraý oblysynyń ákimi Mahambet Dosmuhambetov keshe Teńiz kenishine baryp, ondaǵy ahýalmen tanysqan soń shuǵyl jıyn ótkizdi.

– Atyraý oblysynda jaǵdaı turaqtanǵanymen, Teńiz kenishindegi ahýal áli de alańdatady. Qazirgi kezde «Teńiz» kenishinde ornalasqan 25 jataqhanada turatyn 42 mekemeniń 709 jumysshysynan COVID-19 ınfeksıasy anyqtaldy. 20 mamyrdaǵy málimet boıynsha, 615 naýqastyń 594-i aýrýhanaǵa jatqyzylǵan. Jaǵdaı áli de kúrdeli, – dedi Mahambet Dosmuhambetov. 

Jıyn barysynda oblys ákimdigi tarapynan qurylǵan arnaıy shtabtyń atqarýshy basshysy Aslan Bekjanov, Jylyoı aýdandyq bas sanıtarlyq dárigeri Talǵat Habıbýllın, densaýlyq saqtaý mınıstrligi komıtet tóraǵasynyń orynbasary Nurhan Sádýaqasov, «Teńizshevroıl» JSHS óndiris operasıalary boıynsha menedjeri Garrı Enk qalyptasqan jaǵdaı týraly baıandama jasady.

Sóz sońynda Mahambet Dosmuhambetov Teńiz qalashyǵyndaǵy oblystyq shtab fılıaly men «Teńizshevroıl» kompanıasyna birqatar naqty tapsyrmalar berdi. Atap aıtar bolsaq, karantınge jabylǵan vahtalyq qalashyqtarǵa qatań baqylaý jasaý, sanıtarlyq-dezınfeksıalyq rejımdi baqylaý, túsindirme jumystaryn barynsha arttyrý, provızorlyq stasıonardy medısınalyq mamandarmen qamtamasyz etýdi jedeldetýdi eskertti.

Sondaı-aq «Teńizshevroıl» kompanıasyna merdiger mekemelermen birlese otyryp jumys merzimi bitken qyzmetkerlerdi Teńiz kenishinen kelisilgen talaptardy qatań saqtaı otyryp shyǵarý josparlaryn ázirleýdi júktedi.

Teńiz kenishinde 18 naýryzdan bastap aýdan ákimshiligi janynan qurylǵan shtab, sondaı-aq 20 sáýirden bastap oblystyq shtabtyń fılıaly jumys isteýde. Budan basqa, kúni keshe quramyna Atyraý oblysy ákiminiń eki birdeı orynbasary, birqatar oblystyq departamentter men quqyq qorǵaý organdarynyń basshylary, TSHO basshylyǵy jáne oblystyń bas dárigeri men Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıteti tóraǵasynyń orynbasary kiretin arnaıy jumys toby Teńiz kenishine baryp, jumys istep jatyr.

Eske sala keteıik, QR Memlekettik bas sanıtarlyq dárigeri Aıjan Esmaǵambetova Atyraý oblysyndaǵy Teńiz kenishinde 935 adamnyń koronavırýs juqtyrǵanyn habarlaǵan bolatyn.