Qaraǵandy oblysy taýarlar men qyzmetterdiń sapasy men qaýipsizdigin baqylaý departamentiniń basshysy Qanat Asqarov "Qazaqmys" JSHS korporasıasy karantınge jabylǵanyn málimdedi.

– 21 mamyrda "Qazaqmys" JSHS korporasıasynda 133 qyzmetker indet juqtyrǵan. Solardyń ishinde Temirtaý qalasynan 54 adam, Qaraǵandy qalasynan 65 adam, Buqar jyraý qalasynan 14 adam tirkelgen.  Osy nysanda 1515 jumysshy indet juqtyrǵandarmen baılanysta bolǵan, onyń ishinde 245 adam jaqyn qarym-qatynasta bolǵandyǵy anyqtaldy. Qazirgi tańda áli de tekserý jumystary júrgizilýde, – dedi Q. Asqarov.

Buqar jyraý aýdanynyń bas sanıtarlyq dárigeriniń qaýlysymen bul nysan 1 maýsymǵa deıin jabylyp, barlyq dezınfeksıalyq sharalar júrgizilip jatyr.

– Jumysshylardyń turǵylyqty meken-jaılary boıynsha epıdemıologıalyq tergeý jumystary júrgizildi. Olar 13-17  mamyr aralyǵynda Jezqazǵan qalasynda bolǵany anyqtaldy. Olar otbasymen birge bir jıynǵa qatysqan. Jumysshymen baılanysta bolǵan 17 adam aýrýhanaǵa karantınge jatqyzylǵan. Onyń toǵyzynda koronovırýstyń keıbir belgileri anyqtalýda. Analızder alyndy. Jaqyn arada qorytyndysy shyǵady, – dedi departament basshysy.