Mańǵystaý oblysynyń, Munaıly aýdanynda álemniń 200-den astam eli men olardyń astanalaryn jatqa biletin daryndy  bala turady, dep habarlaıdy «Mańǵystaý» telearnasy. 6 jasar  Jiger Berikbaıuly elderdiń memlekettik týyn dóp kórsetip, prezıdentin, valútasy men qysqasha tarıhyn múdirmeı aıtady. Ol munyń bárin karantın kezinde jattap alypty. 4 jasynda árip tanyp, kitap oqyǵan alǵyr bala bıyl birinshi synypty úzdik bitirmek. Aıta keteıik, ol eshqandaı da qosymsha bilim ortalyqtaryna barǵan emes. Otbasynyń tómen turmysy aqyly ortalyqtarǵa qatynaý turmaq, qarapaıym kórneki quraldar alýdy kótermeıdi. Biraq, bul bilimpaz sábıdiń dúnıeni tanýyna kedergi keltirmepti.

¤Jiger osylaı suraq qoıǵan kez kelgen adamǵa kidirmeı jaýap bere alady. Oıy ushqyr. Jady myqty. Álem elderiniń astanasyn ǵana emes,  sol elderge  qatysty qyzyqty málimetterdi de jattap alǵan. Dúnıejúzi kartasynan kez kelgen eldi lezde  taýyp beredi. Qazir   ol aǵylshyn, orys, arab  tilin  úırenip júr.

-Arabsha bilemin. Sózderin bilemin. Jaza alamyn. +Aǵylshyn tilin úırenip jatyrmyn. Aǵylshyn tilin jaza alamyn, oqı alamyn. + Men Norvegıa, Shvesıa jáne Kanadaǵa barǵym keledi. Kanada men Shvesıa Norvegıa úsheýi taza memleket. Men mamam men ákemdi saıahatqa shyǵaryp, memleketterdi kórsetemin, deıdi Basqudyq aýylyndaǵy №9 mekteptiń 1-synyp oqýshysy Jiger Berikbaıuly.

Zeıindi bala  Abaı men  Muqaǵalıdiń óleńderin de súıip oqıdy. 1-2 oqyǵannan-aq jattap alady. Ol qatarlastary sekildi gadjetten oıyn oınamaıdy. Internetti tek qana álem elderine qatysty aqparat alý úshin qoldanady. Asyq, fýtbol oınaǵandy unatady. Jigerdiń este saqtaý qabiletiniń joǵary ekenin eń birinshi baıqaǵan ájesi nemeresin ózi oqytady.

-4 jasynan bastap kitapqa qyzyǵýshylyǵy boldy. Biz ony úıde oqyttyq. Saýat ashý kitaptaryn, nýlevoıdyń kitaptaryn oqyttyq. Alǵyr bolyp oqyp ketti barlyǵyn. Sodan birinshi klassqa barǵannan keıin oqý ozaty boldy. Sóıtip júrgende karantın bastaldy. Myna "Atlas kartany" taýyp ákelip berdim. Osydan sýretterin kórip, kartalardy qarap, qyzyǵýshylyǵy bastalyp ketti. Karantınde bos jatpaı, túgel memleketterdiń astanasyn, qaı jerde jaıǵasqanyn, prezıdentteri  týlaryn bárin úırendi, deıdi ájesi Zıba Táńirbergenova.

Talaby taýdaı Jiger bolashaqta álemdi aralap, keremetin kórýdi armandaıdy. Sol úshin de birde-bir sabaqty jibermeı oqıdy.  Nátıjesi de jaman emes.  Endi jazǵy demalysta  dúnıeniń tórt buryshynda ornalasqan elderdiń ánuranyn jattap alýdy maqsat etip otyr.