Elimiz pandemıanyń sharyqtaý sheginen ótkenimen, indetpen kúres áli aıaqtalǵan joq. Bul týraly Ulttyq qoǵamdyq senim keńesiniń úshinshi otyrysynda prezıdent Qasym-Jomart Toqaev aıtty.

– Koronavırýs indeti jumysymyzǵa eleýli ózgeris engizdi. Qazirgi tańda elimiz pandemıanyń sharyqtaý sheginen ótti. Biraq indetpen kúres áli aıaqtalǵan joq. Bul indet óte qaýipti. Batpandap kiredi, mysqyldap shyǵady, – dedi Toqaev.

Sondaı-aq prezıdent koronavırýs indeti qazirgi álemniń qundylyqtaryn aıtarlyqtaı ózgertkenin atap aıtty.

– Densaýlyq saqtaý júıesiniń, ózin-ózi qamtýdyń, yntymaqtasý men jaýapkershiliktiń mańyzy arta tústi. Osyǵan sáıkes memleket qyzmetinde jáne qoǵamdyq ómirdiń barlyq salasynda túbegeıli ózgerister bolmaq. Pandemıa bizdiń elimiz úshin de úlken synaq bolyp otyr. Qazaqstan halqy eshqashan da qıyndyqqa moıyǵan emes jáne osy joly birligimizdiń bekem ekenin kórsettik. Biz yrys pen yntymaqtyń arqasynda kez kelgen synaqty abyroımen eńseremiz dep senemin, – dep atap ótti memleket basshysy.