30 mamyrdan bastap Almaty qalasyndaǵy dinı ǵımarattar óz jumysyn bastaıdy. Bul týraly qala ákimdiginiń baspasóz qyzmeti habarlady.

​Almaty qalasy bas memlekettik sanıtarlyq dárigeriniń 2020 jylǵy 28 mamyrdaǵy №32 qaýlysyna sáıkes, erteńnen bastap sanıtarlyq-dezınfeksıalaý rejıminiń talaptaryn qatań saqtaǵan jaǵdaıda qaladaǵy dinı ǵımarattar óz jumysyn bastaı alady.

Karantın ýaqytynda dinı nysandardyń jumys jasaýlaryna qoıylatyn basty talap: ujymdyq is-sharalardyń ótkizilýine shekteý qoıylýy. Atap aıtsaq, juma namazdary, senbi jáne jeksenbi kúni ótkiziletin ǵıbadattar, adamdarmen toptalyp dinı óleńder aıtý sekildi jáne basqa da ujymdyq sıpatqa ıe qulshylyqtardy ótkizýge ruqsat etilmeıdi. Atalǵan shekteýlerdiń basty maqsaty koronavırýstyq ınfeksıa taralýynyń aldyn alý bolyp tabylady.

Sonymen qatar, qulshylyq kezinde dinı qyzmetshiler medısınalyq maska men qolǵap kıýge jáne de áleýmettik qashyqtyqty saqtaýǵa mindetti. Al, maska kımegen jáne respıratorlyq aýrýlardyń kez kelgen belgileri bar (temperatýranyń kóterilýi, jótel, tamaqtyń aýrýy, tynys alýdyń qıyndaýy) adamdar dinı ǵımaratqa kirgizilmeıdi.

Óz kezeginde, dinı sharalarǵa qatysýlaryna ruqsat etilgen adamdarǵa ǵımarat ishinde 15-20 mınýttan artyq bógelýlerine ruqsat etilmeıdi.