Teńizge shyǵatyn joly joq damýshy elder tobynyń tóraǵasy retinde sóz sóılegen Qasym-Jomart Toqaev álemdik qoǵamdastyqtyń nazaryn indettiń saldaryna aýdara otyryp: «Pandemıa barlyq memleketterdiń damýyna qaýip tóndirdi. Ásirese syrtqy qarjylandyrýy, saýda jáne ınvestısıasy azaıǵan teńizge shyǵatyn joly joq damýshy elderge onyń zardaby kóbirek tıdi», – dedi.  

Osy oraıda Memleket basshysy damýshy elderdiń syrtqy qaryzdardy jáne «sıfrlyq teńsizdikti» joıý, taza aýyzsýǵa, jasyl jáne zamanaýı agrotehnologıalarǵa qoljetimdilikti qamtamasyz etý problemalaryn sheshý úshin halyqaralyq is-áreketterdi jumyldyrýǵa shaqyrdy.

Qasym-Jomart Toqaev Qazaqstannyń «BUU-nyń gýmanıtarlyq kómek kórsetýdiń jahandyq josparyn» iske asyrýǵa jáne koronavırýsqa qarsy kúres barysynda birqatar shet memleketke jasaǵan gýmanıtarlyq qoldaýyn erekshe atap ótti. Memleket basshysy elimizdiń jahandyq azyq-túlik qaýipsizdigin qamtamasyz etýge, qaqtyǵystardy retteýge jáne beıbitshilik ornatýǵa beıildi ekenin naqtylady.

Forýmǵa Germanıa, Fransıa, Ońtústik Afrıka Respýblıkasy, Japonıa, Italıa, Ulybrıtanıa, Pákistan, Qyrǵyzstan, Belarýs, Saýd Arabıasy jáne basqa da memleketterdiń kóshbasshylary, Halyqaralyq valúta qory, Ekonomıkalyq yntymaqtastyq jáne damý uıymy, Dúnıejúzilik bank jetekshileri, sondaı-aq, birqatar halyqaralyq qarjy ınstıtýtynyń basshylary qatysty.