Qazaqstanda el ishinde demalatyn on bes jasqa deıingi balalar tegin ushady. Bul týraly "Qazaqtýrızm" ulttyq kompanıasynyń baspasóz qyzmeti habarlady.

Qazaqstandyqtar endi eki balasy úshin ushaqqa bılet satyp almasa da bolady.

Joba"1+2" esebimen 2 jastan 15 jasqa deıingi balalar úshin el ishinde ushýǵa ketetin shyǵyndy óteýdi kózdeıdi.

– Qazaqstandyqtardy el ishinde demalýǵa yntalandyrý úshin biz "KIDS GO FREE" jobasyn ázirledik. Respýblıkalyq búdjettik komısıa qaraýy úshin qarjy mınıstrligine engizdik, – dedi "Qazaqtýrızm".

Ulttyq kompanıanyń esebinshe, bul – demalysty 30%-ǵa arzandatýǵa múmkindik beredi.

100 myń otbasy nemese 600 myń qazaqstandyq úshin 7,6 mlrd teńge sýbsıdıalanǵan kezde, 33 mlrd teńgeden astam qarjy el ekonomıkasyna túsedi. Iaǵnı, Qazaqstan ekonomıkasyna bir teńge sýbsıdıaǵa 5 teńge keledi.

Qazaqstan UEM statısıka komıtetiniń málimetinshe, byltyr ishki týrısiń ortasha chegi 108 myń teńgeni qurady.