Ilon Masktyń SpacX kompanıasynyń "Dragon" ǵarysh kemesi Halyqaralyq ǵarysh stansıasyna (HǴS) jetti.

NASA ǵaryshkerleri Dag Herlı men Bob Bennken Florıdadan senbide ushqan bolatyn. 

Tikeleı efırde ǵarysh kemesiniń Kaspıı teńizinen, Qazaqstan terıtorıasynan, Baıqońyrdyń soltústiginen ótkeni habarlandy.

– Dál qazir "Dragon" mólshermen Kaspıı teńiziniń ústinen ushyp ótip barady. Bulttar jer planetasyna keremet kórinis berip tur... "Dragon" ǵarysh kemesi men Halyqaralyq ǵarysh stansıasy Qazaqstannan ótip bara jatyr. Dál qazir olar Baıqońyrdyń batys jaǵynda birneshe júz mıl qashyqtyqta ketip barady. Baıqońyr keshege deıin bizdiń Qurama Shtattardyń ǵaryshkerleri úshin orbıtaǵa ushyp, Halyqaralyq ǵarysh stansıasyna jetetin jalǵyz qaqpa bolatyn. Olar dál qazir Baıqońyrdyń soltústiginen ótip barady. Biz Qazaqstannyń keremet kórinisin kórip turmyz, – dedi SpaceX-tyń Youtube arnasynyń tikeleı efırinde eki komentatordyń bireýi. 

– Krıs Kessıdı jaqynda ǵana osy Baıqońyrdan Soıýz zymyrany arqyly ushqan bolatyn, – dedi ekinshisi. 

Ǵarysh kemesi Qazaqstan terıtorıasynan ótip, mólshermen bir saǵattan artyq ýaqyttan keıin, Halyqaralyq ǵarysh stansıasymen (HǴS) qosyldy. Ol Almaty ýaqyty boıynsha saǵat 20:16-ǵa týra keldi. Bul kestedegi ýaqyttan sál erterek. Qosylý Qytaıdyń soltústigi men Mońǵolıa shekarasy tusynda 422 shaqyrym  bıiktikte boldy. 

Ǵarysh kemesiniń Qazaqstan terıtorıasynan ótken kezdegi vıdeony tómendegi silteme arqyly kórýge bolady.