Bul týraly Almaty qalasynyń Óńirlik komýnıkasıalar qyzmetiniń alańynda ótken brıfıń barysynda qalanyń memlekettik bas sanıtar dárigeri Jandarbek Bekshın aıtty.

Eske salsaq, birqatar kásiporyndar óz jumystaryn qaıtadan bastady. Almaty qalasynyń ákimi Baqytjan Saǵyntaevtyń bastamasymen árbir aýdandyq ákimdikterde kásipkerlik sýbektilerdiń sanıtarlyq-epıdemıologıalyq talaptardy saqtaýyn qadaǵalaý boıynsha monıtorıńtik toptar qurylǵan.

Bekitilgen monıtorıńtik toptardyń quramyna Almaty qalasynyń Taýarlar men kórsetiletin qyzmetterdiń sapasy men qaýipsizdigin baqylaý departamenti mamandary, Almaty qalasynyń Kásipkerlik jáne ınvestısıalar basqarmasynyń ókilderi, aýdandyq ákimdikterdiń, «Atameken» UKP jáne Polısıa departamentiniń qyzmetkerleri engen.

Monıtorıńtik toptar karantın kezinde jumysyn qaıtadan bastaǵan barlyǵy 1989 nysandy qamtydy.

– Biz 2 myńnan astam tekserý júrgizdik, onyń barysynda tek 65 jaǵdaı boıynsha ákimshilik jaza taǵaıyndaldy jáne 39 nysannyń qyzmeti toqtatyldy. Senbi jáne jeksenbi kúnderi biz 153 nysandy tekserdik. Tekserý sharalary jalǵasady, – dedi Almatynyń bas sanıtar dárigeri.

Óz mindetterine salǵyrt qaraǵan myna tizimdegi dámhanalar men meıramhanalar basshylyǵyna ákimshilik aıyppul salyndy, olar: «Jan plov lagman» meıramhanasy, «Shashlychnaıa na Kırova», «Shashlychnyı dvor», «Borjomı», «Almaty» dámhanalary, sonymen birge, «Baıtas» shaǵyn marketi, al «Dılnaz», «Shapaǵat» dámhanalaryna ákimshilik hattama toltyryldy. «Provans» dámhanasynyń qyzmeti toqtatyldy.