Qazaqstan Reseı men Belarýs elderiniń odaǵyna kirmeıdi. Bul týraly Q.Toqaev Komsomolskaıa pravda basylymyna bergen suhbatynda aıtty.

Jýrnalıs "Qazaqstan Reseı men Belarýs odaǵyna kirýi múmkin be, mundaı odaqqa ortaq valúta, ortaq keden, ortaq parlament qajet pe, álde bizdiń jolymyz EAEO-ny "Shyǵys Eýroodaǵyna" aınaldyrý ma? Bul qanshalyqty múmkin?" degen mazmundaǵy saýalyna Toqaevtyń jaýaby tómendegideı boldy.

– Qazaqstan Reseı jáne Belarýs elderimen ekijaqty formatta da, ıntegrasıalyq birlestikter (EAEO, UQSHU, TMD) aıasynda da belsendi áriptestik júrgizip otyr. Bizdiń Reseı men Belarýs odaǵyna kirý týraly josparymyz joq. Biz úshin basym baǵyt – joǵaryda atalǵan uıymdar aıasynda ıntegrasıany damytý.

Eýrazıalyq Ekonomıkalyq Odaqtyń áleýetin tek ekonomıkalyq odaq retinde kúsheıtýge múddelimiz. Kooperasıalyq baılanystardy damytý, taýarlardyń, kórsetiletin qyzmetterdiń jáne jumys kúshiniń ortaq naryǵyn qurý, atalǵan odaqqa múshe memleketterdiń ınvestısıalyq tartymdylyǵyn arttyrý arqyly EAEO-ny jahandyq aýqymdaǵy tıimdi qurylymǵa aınaldyra alar edik.

Bul baǵyttaǵy jumystar júıeli túrde ilgerileýde. 2025 jylǵa qaraı ortaq energetıkalyq jáne qarjylyq naryq qalyptasady. Ásirese, sıfrlyq yqpaldastyq perspektıvaly baǵyt bolmaq. Keıde EAEO-da, tipti eń joǵary deńgeıde, qyzý pikirtalastar bolady, biraq bul talqylaýlar odaqty neǵurlym tabysty, bedeldi, tartymdy etýge degen ortaq talpynysty bildiredi. Al oǵan nemquraıdy qaraý – anyq degradasıanyń belgisi, – dedi Qazaqstan prezıdenti.