«Jetisý Vólframy» JSHS óziniń QHR-daǵy bıznes-seriktesterimen birge gýmanıtarlyq kómek retinde Almaty oblysynyń ákimdigine 60 myń medısınalyq maska berdi, dep habarlady Almaty oblysy ákiminiń baspasóz qyzmeti.

Koronavırýspen kúres sharalary úshin Qazaqstanǵa jalpy sany 228 myńnan astam bir rettik paıdalanatyn úsh qabatty medısınalyq maska tegin berildi.

«Jiaxin International Resources Investment Co., Ltd» korporasıasynyń vıse-prezıdenti, «Jetisý Vólframy» JSHS atqarýshy dırektory Nazar Terlyganyń aıtýynsha, medısınalyq maskany jetkizý Qazaqstan Respýblıkasynyń Syrtqy ister jáne Densaýlyq saqtaý mınıstrlikteriniń, sol sıaqty Qyzyl Jarty Aı qoǵamynyń tikeleı qoldaýymen júzege asyrylǵanyn aıtty:

- Koronavırýs ınfeksıasynyń taralýyna baılanysty qazirgi qıyn jaǵdaıda biz korporatıvtik áleýmettik jaýapkershiliktiń eń joǵarǵy prınsıpterin berik ustanamyz. «Jetisý Vólframy» JSHS óziniń strategıalyq seriktesteriniń biri «Jiangxi Cooper Corporation» korporasıasymen birge Qazaqstannyń Qyzyl jarty aı jedel qyzmeti arqyly zor kómek kórsetýde. Gýmanıtarlyq kómek kórsetý - jalpy jumysymyzdyń eń mańyzdy bóligi», - dedi ol.

Atap ótsek, «Jetisý Vólframy» JSHS vólfram kenin óndirýge mamandanǵan. Investısıalyq joba ótken jyldan beri Almaty oblysy Eńbekshiqazaq aýdanynda júzege asyrylýda, qazir 400 jumys orny ashylǵan. Investısıalyq jobanyń jalpy quny – 250 mln. AQSH dollary.