"Qytaı men Úndistan shekarasyna eki eldiń áskerı kúshteri jınaldy, búkil álem boıynsha dabyl qaǵylýda. Úshinshi dúnıejúzilik soǵys qaýpi tónip tur" dep jazdy brıtanıalyq Daily Express basylymy. Bul týraly Qamshy tilshisi habarlaıdy. 

Áskerlerdi ornalastyrý aýqymy týraly resmı rastama bolǵan joq, biraq "Qytaı Halyqtyq azattyq armıasy Tıbet ústirtiniń bıik aýdandarynda jumys isteýge birneshe jetildirilgen qarý-jaraq júıeleri men joıǵysh ushaqtar jiberdi" degen boljam bar.

"Úndi armıasy shekara mańyndaǵy Ladah qalasynda ornalasqan jaıaý ásker dıvızıasynan birneshe batalóndardy shekara boıyndaǵy jedel daıyndyq aımaǵyna kóshirdi" delingen habarlamada.

Basqa aýdandardan da áskerı kúshter jumyldyrylǵan.

Daýly terıtorıalarǵa talas eki jaqtyń da shekaralyq aýmaqta áskerlerin kúsheıtýge sebep bolýda. Órship bara jatqan qaıshylyq iri áskerı qaqtyǵysqa ákelýi múmkin. Keıbir jahandyq qorǵanys sarapshylary aımaqtyń beıbitshiligine kepildik joq ekenin eskertedi.

Gonkongtyq áskerı sarapshy Lán Gýolıangtyń aıtýynsha, Beıjiń taraby jaıaý ásker, artılerıa, áýe qorǵanysy, avıasıa kúshterimen qosa, hımıalyq, ıadrolyq jáne elektrondy soǵys salasyndaǵy mamandardan turatyn keminde toǵyz qurama topty ornalastyrǵan.

Bir aı buryn Úndistan men Qytaı shekarasyndaǵy Galvan ózeniniń alqabynda eki jaqtyń sarbazdary arasynda tóbeles, tas atys bolyp, qaqtyǵys oryn alǵan.