Mańǵystaýǵa qajetti mamandyqtarǵa bıyl oblys ákiminiń 175 granty bólinedi.
Bul týraly qoǵamdyq komýnıkasıa ortalyǵynda ótken brıfıńte Mańǵystaý oblystyq bilim basqarmasynyń basshysy Asqar Seıdelıev málim etti.
Jyldaǵy dástúr boıynsha maýsym aıynda ótetin UBT qorytyndysymen memlekettik granttar bólinetin bolady. Mınıstrlik tarapynan bıylǵy memlekettik grant kólemi 69 256 orynǵa bekitildi. Onyń ishinde bakalavrıatqa - 53 785 grant, magıstratýraǵa - 13159 grant, PhD doktorantýraǵa - 2312 grant.
Aqtaý qalasyndaǵy Esenov ýnıversıtetiniń 32 sh/a ornalasqan bas ǵımaratynda 13-20 shilde kúnderi qabyldanady. 21 shilde men 1 tamyz aralyǵynyda qujattar qaralyp, nátıjesi 1 tamyzdan keıin anyqtalady.
-Budan basqa jyl saıyn óńirge qajetti mamandyqtarǵa, birinshi kezekte, medısına, pedagogıka, IT, qurylys, mashına jasaý, veterınarıa jáne aýylsharýashylyǵy salasy mamandaryna jergilikti búdjetten qarjylandyrylatyn grant kólemi bekitildi. Bıyl da shamamen 175 grant bólýdi josparlap otyrmyz – dedi, Mańǵystaý oblystyq bilim basqarmasynyń basshysy Asqar Seıdalıev.
Atalǵan konkýrs memlekettik grant konkýrsy ótkennen keıin shilde – tamyz aılarynda óńirdiń úkimettik emes uıymdar, qoǵamdyq uıymdar, memlekettik organdar ókildernen quralǵan oblys ákiminiń orynbasarynyń tóraǵalyǵymen qaralady. Jergilikti basqarmalar men kásiporyndarǵa qajetti mamandyqtardy naqtylap sol mamandyqty tańdaǵan túlekter arasynda uıymdastyrylatyn bolady.
Sonymen qatar 2020-2021 oqý jylyna memlekettik bilim berý tapsyrysy tehnıkalyq jáne kásiptik bilim berý uıymdaryna 4004 orynǵa qalyptastyryldy.
2014 jyldan bastap «Máńgilik el jastary – ındýstrıaǵa!» -Serpin-2050» baǵdarlamasy iske asyrylýda. Atalǵan joba Almaty, Jambyl, Qyzylorda, Ońtústik Qazaqstan jáne Mańǵystaý oblystarynda iske asyrylady.
Serpin grantyna UBT men keshendi testileýden kem degende 50 baldan kem emes jáne tańdaý pániniń upaıy kem degende 7 baldan tómen bolmaǵan túlekterdiń qatysýǵa múmkindigi bar.