Bıyl Mańǵystaýda 5448 túlek UBT tapsyrady.
Bul týraly qoǵamdyq komýnıkasıa ortalyǵynda Mańǵystaý oblystyq bilim basqarmasynyń basshysy Asqar Seıdalıevtiń qatysýymen ótken brıfıńte málim boldy
Ulttyq birińǵaı testileý ádettegideı respýblıka boıynsha 20 maýsymnan bastalady. Bıylǵy oqý jylynda 6365 oqýshy mektep bitiredi (2019 jyly-5590). Onyń ishinde 5931-i kúndizgi mekteptiń, 434-i keshki mekteptiń túlekteri. UBT ǵa 5736 oqýshy qatysady (onyń ishinde bıylǵy bitirýshi túlekterdiń 5448-i (85,6%), buryn mektep bitirgen 246 túlek pen kolejderdiń 42 túlegi). UBT suraqtary 2019-2020 oqý jylynyń 3 toqsany men onyń aldyńǵy ótken materıaldardan qurylatyn bolady.
Óńir boıynsha 4 UBT ótkizý pýnkti bar. Olar Aqtaý, Jańaózen qalasy men Beıneý, Qaraqıa aýdandarynda ornalasqan. Bilim basqarmasy tarapynan UBTÓP terdi baqylaý komısssıalary quryldy. UBT nátıjeleriniń ashyqtyǵyn qamtamasyz etý baǵytynda barlyq aýdıtorıalar salqyndatqyshtar, ortalyq translásıaǵa qosylatyn beınebaqylaý júıeleri, uıaly baılanysty tunshyqtyrǵysh qurylǵylar jáne metal izdegishtermen tolyq qamtamasyz etiledi. Shalǵaı aýyldarda turatyn 966 balaǵa mektep avtobýstarymen tasymal uıymdastyrylady (Mańǵystaý -270, Qaraqıa – 164, Munaıly -562), Avtobýstardyń tehnıkalyq jaǵdaılary men júrgizýshilerdiń densaýlyq jaǵdaılary quzyrly organdardyń tarapynan tekserýden ótedi.
Bıylǵy sanıtarlyq talaptarǵa sáıkes oryndar arasyndaǵy 2,5-3 metr ara qashyqtyqty saqtaý úshin burynǵy bekitilgen UBTÓP terge lekter sanyn arttyra otyryp bólip kirgizip, 54 aýdıtorıada 50% tolymdylyqpen otyrǵyzatyn bolady.
Otyrǵyzý tártibi oblystyń bas sanıtarlyq dárigerimen kelisilgen. Bıylǵy UBT ýaqyty 10 mınýtqa uzartylǵan, ol ýaqyt maskalar aýystyrý, dezınfeksıalaý jáne dene qyzýyn ólsheýge arnalady.
Ulttyq birińǵaı testileý pýnktterine qatysýshylar bólip, arnaıy tekserýden ótkizilip, kirgiziledi. Ol úshin qatysýshylar lentalarmen bólingen arnaıy bekitilgen oryndarda turady. Budan basqa árbir UBT ótkizý pýnktteri dezınfeksıalyq tonneldermen jabdyqtalady, dezınfeksıalyq tósemsheler tóseledi, sanıtaızerler, maskalarmen jabdyqtalady. Kireberiste úıden kıip kelgen maskalar aýystyrylady. Bıyl shoǵyrlanýdyń aldyn-alý úshin ata-analardyń UBTÓP terge kelýine tyıym salynady. UBT barysyn onlaın translásıamen úıden qadaǵalaý qajet. Onlaın translásıa barlyq aýdıtorıalardan youtube kanaly arqyly tikeleı translásıa tártibinde júredi. Sonymen qatar, UBT ótetin ýaqyttarda jedel járdem qyzmeti, basqa da tıisti qaýipsizdik sharalary qamtamasyz etiledi.