Júzdegen atyraýlyq balalar Ońtústik Qazaqstan óńirindegi lagerde demalyp jatyr.
Tabıǵaty ásem Mashat shatqalyndaǵy lager taýdyń eteginde, taza taý ózeniniń mańynda oryn tepken. Atyraýlyq jas órender munda 12 kún boıy demalady.
«Bizde mundaı taýlar joq. Ertegiler eline tap bolǵandaı áserde júrmiz», - deıdi atyraýlyq oqýshy Aleksandr Iýgaı.
Lager aýmaǵynda baseın, sport alańy bar. Balalardyń ýaqyttaryn tıimdi ári kóńildi ótkizýi úshin barlyq jaǵdaı jasalǵan.
Qazirgi kezde lagerde Atyraýdan kelgen 300 bala demalýda. Jaz sońyna deıin taǵy sonsha óren kelmek. Demalýshylardyń ishinen asa belsendilik tanytqandary lagerdiń jabylý saltanatyna shaqyrylatyn bolady.
Balalar men jasóspirimderdiń jazǵy demalysy men ispen aınalysýyn uıymdastyrý máselesi búgingi tańda anaǵurlym ózekti áleýmettik problemalardyń biri bolyp otyr.
Tipti Bilim jáne ǵylym mınıstrliginiń resmı derekteri boıynsha oqýshylardy uıymdastyrylǵan jazǵy demalys túrlerimen qamtý deńgeıi tómendep keledi. Mysaly, 2010 jyly ol 92,7 paıyzdy, 2012 jyly – 91,4 paıyzdy quraǵan. Biraq teksere kele bul sandar da óte joǵary ekenine kóz jetedi, óıtkeni balalardyń qysqa ýaqyt bolatyn mektep janyndaǵy lagerlerin uıymdastyrý olardyń jazǵy kanıkýl kezeńinde demalysyn, bos ýaqyty men bir ispen aınalysýyn uıymdastyrýdyń negizgi baǵyty bolyp qalýda. Onymen tek kishi synyp oqýshylary qamtylady, jáne de kóbinese tamaqtandyrýsyz, demalys úshin qajetti jaǵdaılarsyz uıymdastyrylady, sondaı-aq joǵary synyp oqýshylary jınaý jáne mekteptiń jańa oqý jylyna daıyndalý boıynsha eki aptalyq praktıkamen qamtylady.
Kelesi jyldan bastap Qazaqstannyń daryndy oqýshylary da Mashat shatqalynda demalatyn bolady dep josparlanýda.
Derekkózi: QazAqparat
