Búgin Májilistiń jalpy otyrysynda depýtattar Úkimettiń  jáne  Esep komıtetiniń 2019 jylǵy respýblıkalyq búdjettiń atqarylýy týraly esepterin qarady.

Májilis Tóraǵasy Nurlan Nyǵmatýlın atap ótkendeı, bólingen jáne jumsalǵan búdjet qarjysy halqymyzdyń ál-aýqatyn arttyrýǵa baǵyttalyp, naqty áleýmettik-ekonomıkalyq máselelerdi sheshýi kerek.

Ótken jyly jalpy ishki ónim ósimi 4,5% qurap, syrtqy saýda aınalymy 97 mlrd dollarǵa jetti. 2,7 mln qazaqstandyqtyń eńbek aqysy ósti. «Nurly jol», «Nurly jer» memlekettik baǵdarlamalaryn júzege asyrý jáne aımaqtardy damytýda  13 mln sharshy metrden astam turǵyn úı salýǵa múmkindik berdi.

– Memleket basshysy Qasym-Jomart Kemeluly Toqaev elimizdiń 2019 jylǵy áleýmettik-ekonomıkalyq damý qorytyndylary boıynsha Úkimettiń keńeıtilgen otyrysynda atap kórsetkendeı, bul «Nur Otan» partıasynyń saılaý aldyndaǵy baǵdarlamany jáne halyqqa Joldaýdy júzege asyrý úshin Úkimet pen Parlamenttiń úılesimdi atqarǵan jumysy, – dedi Májilis Tóraǵasy.

Sonymen birge, Nurlan Nyǵmatýlınniń pikirinshe, talqylaý qorytyndylary el basshylyǵynyń ekonomıkany túbegeıli reformalaý baǵdarlamasyn jasaý qajettiligi týraly nusqaýlary negizinde qarastyrylýy kerek. Túbegeıli ózgeristi, memleket qarjylarynyń maqsatsyz jumsalýy talap etip otyr.

Sonymen qatar, otyrys barysynda Ulttyq qordan bólinetin qarajat máselesi qaraldy.

Atap aıtqanda, depýtattar Ulttyq qordan maqsatty transfertke baılanysty joǵary oqý oryndarynda josparlanǵan kovorkıng aımaǵyn ashý máselesin kóterdi. Májilis depýtattarynyń aıtýynsha, 2019 jyly bul maqsattarǵa 663 mıllıon teńge bólingen. Alaıda, bul qarajattardyń ıgerilmeýi 100 paıyzdy qurady. Úkimet esebinde munyń sebebi qarjylandyrýdyń basqa kózderin paıdalaný múmkindigine baılanysty osy qarajatqa suranystyń bolmaýymen túsindiriledi.

Osy jaıynda, Májilis Tóraǵasy N.Nyǵmatýlın Ulttyq qordyń qarjysyn   shashýǵa bolmaıtynyn, onyń  árbir tıyny qatań baqylaýda bolyp, ol qarjylardy erekshe jaǵdaılarǵa ǵana  paıdalaný qajettigin aıtty.   

Sondaı-aq, talqylaý barysynda álemdik daǵdarys jaǵdaıyndaǵy áleýmettik-ekonomıkalyq damý máselelerin sheshýdiń jańa tásilderine degen qajettilik týraly aıtyldy.

– Memlekettik búdjettiń  tıimdi bolýy  –  tek ǵana  bólingen  jáne  ıgerilgen qarajatqa  baılanysty emes. Ol qarjylardyń barlyǵy naqty ekonomıkalyq-áleýmettik máselelerdi sheship, halqymyzdyń ómir sapasyn arttyrýǵa yqpal etý kerek. Bul Memleket basshysy Qasym-Jomart Kemeluly Toqaev Qazaqstan halqyna Joldaýynda da alǵa qoıǵan negizgi mindetterdiń biri. Sondyqtan, búdjettiń árbir tıyny qaıda jáne qandaı maqsatqa jumsalǵany aldaǵy ýaqytta da depýtattyq korpýstyń baqylaýynda bolady, – dedi Nurlan Nyǵmatýlın.