"Jaqynda Parlament Májilisi men máslıhat depýtattarynyń saılaýyna kandıdattardy praımerız arqyly anyqtaıtynyn jarıalady Nur Otan partıasynyń basshylyǵy. Qalaı bolǵanda da bul durys qadam. Saılaýǵa qatysatyn kandıdattar partıa ishindegi báseke arqyly anyqtalady. Shaǵyn quramdaǵy partıa organdary eshkimmen aqyldaspaı tizim jasaı salý degen endi bolmaıdy.

 

Osy jerde "Praımerız ne beredi?", "Qandaı artyqshylyqtary bar?" degen suraqtardyń jaýaby da ózinen-ózi túsinikti bolǵan sıaqty.

 

Birinshiden, partıa músheleri saılaýǵa kimder kandıdat bop qatysatynyn bilip qana qoımaıdy, olardy irikteýge atsalysady. Baǵdarlamalarymen tanysady, kandıdattyń múmkindikterin, ómir joly men tájirıbesin zertteı alady.

 

Ekinshiden, praımerız kezinde kandıdattyń, partıanyń baǵdarlamasyn jarıa túrde ázirleý múmkindigi týady. Praımerızge qatysqan ár azamattyń usynystary bolashaqta partıa fraksıalary basshylyqqa alatyn negizgi qujatqa aınalady.

 

Úshinshiden, saılaýǵa qatysý belsendiligine de praımerız oń áser etýi tıis. Óıtkeni, kandıdattardy irikteýge qatysqan adam, saılaýda óz kandıdaty úshin daýys berýge tikeleı múddeli bolady ǵoı.

 

Bizde tek respýblıka deńgeıinde ǵana emes, aımaqtarda da ózekti máseleler, ár salada jańa ádis-tásilderdi talap etetin qıyndyqtar joq emes. Ýaqyt máslıhattarǵa jańa mindet artyp otyr. Aldaǵy saılaýda jergilikti ókildik organdardyń quramy barynsha jańarýy, oǵan jańa adamdar ótýi kerek dep sanaımyn. Máslıhat depýtaty bolam degen adam burynǵysha óz kandıdatýrasyn usyna salmaıdy, fılıal tóraǵasymen, ne ákimmen jaqsy qarym-qatynasta bolýy da jetkiliksiz. Endi bolashaq kandıdattar óz ustanymdaryn, baǵdarlamalaryn ashyq básekelestik jaǵdaıynda kópshilikke tanystyryp, jaqtastar jınaýy qajet. Osy jerde Nur Otan partıasynyń partıaǵa múshe emes azamattarǵa da kandıdat retinde praımerızge qatysý múmkindigin usynyp otyrǵany qoǵamnyń damýy úshin oń qadam ekenin atap ótken jón. Bul – partıa da jańarýǵa, qoǵam únin tyńdaýǵa túbegeıli bet burdy degen sóz.

 

Buıyrtsa, praımerızge qatysyp, aımaqtyq deńgeıdegi máselelerge baılanysty debatqa túsý, sol arqyly saıası tájirıbe jınaý oıymyzda. Sátin salyp, baǵymyz janyp jatsa ony da kórermiz. Bastysy – syrttan baqylaýshy bolýmen shektelmeı, úlkendi-kishili máselelerdi sheshýge tikeleı aralasý" delingen jazbada.