QR Premer-Mınıstri Asqar Mamın Jambyl oblysynda  Qordaı aýdanynyń Gvardeıskıı qala úlgisindegi kentinde QR BǴM Ǵylym komıtetiniń Bıologıalyq qaýipsizdik máseleleri ǵylymı-zertteý ınstıtýty (ǴZI) janyndaǵy vaksına shyǵaratyn bıofarmasevtıkalyq zaýyttyń qurylysyn bastap berdi. 

Zaýyt tıisti óndiristik tájirıbeniń (GMP) halyqaralyq standarty boıynsha ımmýnobıologıalyq dári-dármekter, onyń ishinde koronavırýs ınfeksıasyna qarsy vaksına shyǵaratyn bolady. Qazirgi tańda Qazaqstan ǴZI-nyń COVID-19-ǵa qarsy kandıdattyq vaksınasy DDSU tizimine engizilgen jáne klınıkaǵa deıingi synaqtan sátti ótip jatyr.

Sondaı-aq kásiporynda pandemıalyq tumaýǵa, týberkýlezge, brýselezge, nodýlárlyq dermatıtke, usaq kúıis qaıyratyn janýarlar obasyna, qoı men eshkiniń kontagıozdy ektımasyna, qoı sheshegine, qutyrmaǵa jáne basqa da juqpaly aýrýlarǵa qarsy vaksınalar shyǵarylady.

Qurylys jumystaryn bıyl jeltoqsan aıynda aıaqtaý jáne jyl saıyn bıofarmasevtıkalyq preparattardyń 60 mln dozasyna deıin óndirý kózdelgen.

QR BǴM Ǵylym komıtetiniń Bıologıalyq qaýipsizdik máseleleri ǴZI 1958 jyly KSRO-nyń 6 iri vırýsologıalyq ınstıtýtynyń biri retinde quryldy. Shtat 214 ǵylymı qyzmetker men jetekshi vırýsolog-ǵalymdardan (akademıkter, doktorlar jáne ǵylym kandıdattary, PhD) quralǵan, qaýipti ınfeksıalarmen jumys isteýge arnalǵan 13 zerthanany qamtıdy.

Qazirgi ýaqytta ǴZI 5 zerthana bazasynda otandyq vaksınalardyń 67 túrin óndirdi, onyń ishinde, densaýlyq saqtaý salasy úshin joǵary patogendi qus tumaýyna qarsy (álemde 7) jáne joǵary patogendi shoshqa tumaýyna qarsy (álemde 6), aýyl sharýashylyǵy salasy úshin qus tumaýyna qarsy (álemde alǵashqylardyń biri), brýselezge qarsy jańa vektorlyq vaksına (álemdik analogtardan asyp túsedi). Osy jyly aýsylǵa qarsy vaksına jáne 4 SOVID-19-ǵa qarsy vaksına ázirlenýde.