SHQO ákimi Danıal Ahmetov Alakólge jumys saparymen baryp, jazǵy maýsymnyń ashylýyna baılanysty kásipkerlerge sanıtarlyq-epıdemıologıalyq talaptardy saqtaý máseleleri boıynsha kezdesý ótkizdi.
Búgingi kúni Shyǵys Qazaqstanda koronavırýstyq ınfeksıa juqtyrǵan 204 adam tirkeldi. Mundaı jaǵdaı Úrjar aýdanynda da oryn aldy. Qazirgi kúni osy aýdanda 14 adam koronavırýstyq ınfeksıaǵa shaldyqqan. Budan bólek, aımaqta eshqandaı belgisiz sebeptermen aýyrǵan 100-ge jýyq jaǵdaı tirkeldi. Bul adamdar ınfeksıanyń taralý kózi. Soǵan baılanysty Alakól jaǵalaýynda sanıtarlyq-epıdemıologıalyq talaptardy saqtaýǵa basa nazar aýdarylyp otyr.
Máselen, shyǵys jaǵalaýdaǵy serýendeý jáne sýǵa túsý aımaǵynyń jalpy qoldanystaǵy aýmaǵy 2 shq. astam jerdi quraıdy. Onda shamamen 12 myń adam júre alady. Al bul demalýshylardyń jappaı aýrýyna ákelip soǵýy múmkin. Ótken jyly Alakólge 700 myńnan astam adam keldi.
Sondyqtan aýrý juqtyrýdy azaıtý maqsatynda demalýshylardan COVID-19 testinen ótkeni jáne juqtyrmaǵany jóninde anyqtama talap etiledi. Anyqtamanyń ýaqyty jaramsyz bolmaýy kerek.
Aıta keteıik, Alakólge kireberiste jyljymaly medısınalyq pýnkt jumys isteıtin bolady. Onda testileýden ótip, anyqtamany alýǵa bolady. Eger naýqastar anyqtalsa, Úrjar aýdandyq aýrýhanasyna qaralady. Qabanbaı aýylynda 12 ınfeksıalyq tósek pen 2 IVL apparaty bar.
– Bizdiń basty mindet – qazaqstandyqtardyń ómiri men densaýlyǵyn saqtap qalý. Sizder komersıalyq qyzyǵýshylyqtardy emes, adamdardyń qaýipsizdigin oılaýlaryńyz kerek. Barlyq nysan maýsym daıyn ekeni týraly anyqtamany alǵan soń ǵana jumysqa kirisedi, – dedi Danıal Ahmetov.
Oblystyń bas sanıtar dárigeri Marat Ismaılovtyń aıtýynsha, búgingi kúnge deıin birde-bir demalys orny týrıserdi qabyldap alýǵa daıyn degen aktini almaǵan.
5-9 maýsym aralyǵynda 3 monıtorıńtik top 175 demalys ornyndaǵy sanıtarlyq-epıdemıologıalyq normalardy tekserdi. Qazirgi kúni 72 demalys orny sanıtarlyq-epıdemıologıalyq qaýipsizdik sharalaryn oryndaýǵa kirisýde. Qalǵan 103-i áli daıyndyqty bastaǵan joq.
– 41 demalys ornynda dezınfeksıalyq quraldar bar. 31-de sanıtaızerler ornatylǵan. 20-da termometrler qoıylǵan. Tek eki demalys ornynda ǵana áleýmettik qashyqtyq saqtalǵan. Sondaı-aq 43 saýda jáne qyzmet kórsetý nysandary baqylaýǵa alyndy. Onyń ishinde eki dúken ashyldy. Monıtorıńtiń qortyndysy boıynsha 7 sanıtarlyq-epıdemıologıalyq normalardy buzýshylyq anyqtaldy. Endi atalǵan dúkender barlyq másele sheshilgenge deıin jumystaryn ýaqytsha toqtatady, – dedi Marat Ismaılov.
Jazǵy maýsym barysynda monıtorıńtik top jumysyn jalǵastyrady. Top músheleri demalys oryndaryn, qoǵamdyq tamaqtaný jáne ózge de nysandardy júıeli túrde tekserýdi kózdep otyr. Monıtorıńtik shtabtyń quramynda belsendi demalys oryndarynyń ıeleri men bıznesmender bolady.
Kezdesý barysynda bıznesmender suraqtaryna jaýap alyp, sanıtarlyq-epıdemıologıalyq sharalardy saqtaý mańyzdy ekenin atap ótti.
– Barlyq shara adamdardyń ómirin saqtap qalý úshin jasalady. Biz talaptardy qoldaımyz, tazalyqty saqtaımyz. Alakóldiń jaǵalaýynda demalý úshin týrıserge testten ótip, densaýlyqtaryna beı jaı qaramaýǵa shaqyramyz. Óıtkeni eń mańyzdysy – qaýipsizdik, – dedi «İnjý» demalys ornynyń ıesi Dýlat Asylbekov.
Kóptegen kásipkerlerdiń ótinishi boıynsha SHQO ákimi bıznes nysandaryn toltyrý úshin jańa usynys aıtty. 13-23 maýsym aralyǵynda jaǵalaýdaǵy demalýshylar arasynda kornavırýstyq ınfeksıa anyqtalmasa, demalys oryndarynyń ıelerine qonaqúı nómirlerin 75 paıyzǵa deıin toltyrýǵa múmkindik beriledi. Eger jaǵalaýdaǵy jaǵdaı turaqty bolsa, barlyq nysan 1 shildeden bastap tolyq jumysqa kirisedi.
SHQO aqparat agenttigi
Pikir qaldyrý