Halyqaralyq Amnesty International (AI) adam quqyǵyn qorǵaý uıymy azamattyq belsendi Ásıa Tólesovanyń negizsiz qamaýda otyrǵanyn aıtyp, bılikti ony bosatýǵa shaqyrdy, dep jazady Azattyq. 

Bılik Ásıa Tólesovany 6 maýsym kúngi narazylyq kezinde polıseıdiń "ar-namysyna tıdi" jáne "kúsh qoldandy" dep aıyptaǵan. 10 maýsymda Almaty qalasynyń tergeý soty Tólesovany 10 kúnge qamady. Ol úsh jylǵa deıin bas bostandyǵynan aırylýy múmkin.

16 maýsymda jarıalanǵan málimdemede quqyq qorǵaý toby Tólesovany qamaý Qazaqstannyń adam quqyǵy salasynda alǵan mindettemeleri men zańnamasyna qaıshy keledi dep jazdy.

"Ásıa Tólesovany qamaýda ustaý bul asyra siltegendik, ony saıası belsendiligi úshin jazalap otyrǵanǵa uqsaıdy" delingen málimdemede.

6 maýsymda polısıa narazylardy ustap jatqan kezde Tólesova janyndaǵy polıseılerdiń biriniń fýrajkasyn qaǵyp túsirgennen keıin "bılik ókiline kúsh jumsaý" baby boıynsha kúdikke ilindi. Kýágerlerdiń aıtýynsha, azamattyq belsendi oǵan deıin polısıa ustaǵan azamattarǵa arasha túspek bolǵan.

Tólesovanyń ózi jelide "Polısıanyń qoǵamǵa esh qaýip tóndirmeı óz oıyn beıbit jolmen aıtýǵa kelgen qarýsyz jurtqa jasaǵanyn kórgende emosıamdy jasyra almadym" dep jazdy.

9 maýsymda quqyq qorǵaýshylar, azamattyq qoǵam ókilderi prezıdent Qasym-Jomart Toqaevqa hat jazyp, Tólesovany bosatýǵa shaqyrdy. Olar sonymen birge sońǵy birneshe jyl ishinde beıbit jıyn kezindegi polısıanyń áreketin táýelsiz zertteýdi surady.

Ótken aptada Human Rights Watch uıymy da Tólesovany bosatýdy, onyń ústinen qozǵalǵan qylmystyq isti toqtatýǵa shaqyrǵan.

AI uıymynyń pikirinshe, 10 maýsym kúngi kúdikti, advokat, sýdıa jáne prokýror ǵana qatysqan onlaın sot otyrysyn ashyq ótti deýge kelmeıdi.

"Úkimet koronavırýstyń taraýyn shekteý maqsatynda sot prosedýralaryna ózgeris engizýge májbúr bolsa da, bul ózgerister adamdardyń ashyq ári ádil sotqa tartylý quqyǵyn taptamaýy tıis" delingen málimdemede.