Almatyda 20-21 maýsymda Almaly aýdanynda 60-tan asa saýda jáne oıyn-saýyq orny, 50 sport ortalyǵy men 20 skver jabylady, dep habarlady qala ákimdiginiń baspasóz qyzmeti.

Atalǵan nysandar elde epıdemıologıalyq jaǵdaıdy turaqtandyrý maqsatynda engizilgen shekteý sharalarymen baılanysty jabylady. Aýdan ákimi Bekqalı Torǵaevtyń aıtýynsha, eki kún ishinde ýaqytsha jumysyn toqtatqan obektilerde aýqymdy sanıtarlyq is-sharalar ótkiziledi. Al qoǵamdyq oryndarda turǵyndardyń jıylmaýyn tártip saqshylary qadaǵalaıtyn bolady.

– Almaly aýdanynda shekteý sharalaryna baılanysty birqatar nysandar ýaqytsha jabylady. Ol Panfılov boıymen ornalasqan júrginshiler kóshesi, sondaı-aq, Jibek Joly kóshesindegi Arbat demalys ornyna da aýdan turǵyndarynyń kelýine ruqsat etilmeıdi, – dedi Almaly aýdanynyń ákimi Bekqalı Torǵaev.

Sondaı-aq, aýqymdy dezınfeksıa jumystary shekteý sharalary qoıylǵan barlyq aýdanda jasalmaq. Tek Jetisý aýdanynyń ózinde sanıtarlyq óńdeý 20 bazar, 10 sýpermarket jáne 15 fıtnes-ortalyqta júrgiziledi. Al, Naýryzbaı aýdanynda demalys kúnderi iri 2 saıabaq pen 3 bazar, saýda úıleri men İle Alataý ulttyq parkiniń mańaıy qala turǵyndary úshin jabylady. Bul týraly Naýryzbaı aýdany ákiminiń orynbasary Baǵlan Dándibaev onlaın-brıfıngte habarlady.

– Naýryzbaı aýdanynda «Barlyq», «Taý samaly» jáne «Aq bulaq» bazarlarynyń jumysy toqtatylady. Saýda úıleri jáne «Sabyrjan», «Bekker» sekildi úlken sýpermarketter jabylady. Sondaı-aq, 6 fıtnes ortalyqtardyń jumysyna da shekteý qoıylady, – dedi Naýryzbaı aýdany ákiminiń orynbasary Baǵlan Dándibaev.